कोबी पनीर सँडविच

साहित्य :-

१. किसलेला कोबी अर्धा कप 

२. किसलेलं पनीर अर्धी वाटी 

३. किसलेलं आलं १ चमचा 

४. हिरव्या मिरचीचे बारीक तुकडे १ चमचा अथवा चवीनुसार 

५. बारीक चिरलेली कोथिंबीर पाव कप 

६. चवीनुसार मीठ 

७. ६ ते ८ व्हीट ब्रेड 

८. ब्रेड भाजायला बटर 

कृती:-

प्रथम किसलेलं पनीर, कोबी, आलं, मिरची, कोथिंबीर आणि मीठ या सर्व गोष्टी एका बाऊल मध्ये एकत्र करून घ्याव्यात. एक १० मिनिटे हे मिश्रण झाकून ठेवावे. म्हणजे कोबीला पाणी सुटून हे मिश्रण चं एकजीव होईल. मग ब्रेडच्या स्लाईसला आतून बाहेरून बटर लावावे. एका स्लाईसवर हे मिश्रण घालून वरून दुसरा स्लाईस दाबून लावावा. मग हे सँडविच तव्यावर दोन्ही बाजूने छान सोनेरी रंगावर भाजून घ्यावे. तव्यावरून काढून मग या सँडविचचे त्रिकोणी तुकडे कापून घ्यावेत. केचअप बरोबर serve करावे. मुलांना डब्यात द्यायला हे सँडविच खूपच छान आहेत. 

वाढणी :- १ ते २ माणसे 

राईस आणि कॉर्न बॉल्स

साहित्य:-

१. शिजवलेला भात २ वाट्या 

२. शिजवून मॅश केलेले  कॉर्न

३. पाव वाटी मैदा 

४. १ कप दूध 

५. ३ ते ४ चमचे बटर 

६. २ हिरव्या मिरच्या 

७. पेरभर आलं 

८. २ ते ३ लसणाच्या पाकळ्या 

९. अर्धी वाटी कोथिंबीर 

१०. पाव वाटी कॉर्नफ़्लॉर 

११. अर्धी वाटी ब्रेड क्रम्स 

१२. चवीनुसार मीठ 

१३. तळणीसाठी तेल 

कृती:-

प्रथम आलं, लसूण, मिरची वाटून घ्यावी. एका पसरट जड बुडाच्या पातेल्यामध्ये बटर घालावे आणि ते वितळायला लागले की त्यात मैदा घालावा. सतत ढवळावे म्हणजे मैदा जास्त भाजला जाणार नाही. मैद्याला रंग चढायच्या आधी त्यात दूध घालावे. दूध घातल्यावर मात्र सतत गुठळ्या होणार नाहीत याची काळजी घेत ढवळावे. हा सॉस घट्ट होत आला की  एका पसरट ताटलीमध्ये काढून घेऊन गार करून घ्यावा. गोल होईल अशा consistency चा हा व्हाईट सॉस तयार झाला की मग त्यात शिजवलेला भात, कॉर्न, मिरची आलं आणि लसणाच वाटण, कोथिंबीर, कॉर्नफ़्लॉर, ब्रेड क्रम्स व चवीनुसार मीठ घालावे. हे मिश्रण छान एकजीव करून घ्यावे. त्याचे छोटे छोटे गोळे करून घेऊन तेलावर मध्यम आचेवर छान सोनेरी रंगावर टाळून घ्यावेत. कुठल्याही चटणी किंवा सॉस बरोबर serve करावेत. 

वाढणी :- ३ ते ४ माणसे. 

ब्रेड रोल्स

साहित्य :-

१. ब्रेडचे स्लाईस ६ ते ८ 

२. उकडलेले बटाटे ३ ते ४ 

३. वाफवलेले मटार अर्धी वाटी 

४. हळद अर्धा चमचा 

५. तिखट अर्धा चमचा 

६. गरम मसाला १ चमचा 

७. आमचूर पावडर १ चमचा 

८. धणेपूड १ चमचा 

९. भरपूर कोथिंबीर 

१०. चवीनुसार मीठ 

११.  फोडणीसाठी तेल  

१२. तळणीसाठी तेल   

१३. अर्धी वाटी दूध

कृती :-

एका पातेल्यात फोडणीसाठी तेल घ्यावे. त्यात जिरे घालावेत. ते तडतडले की त्यात हळद, तिखट, गरम मसाला, आमचूर पावडर, धणेपूड घालावी. मसाला तेलात नीट मिक्स करून घ्यावा. उकडलेला बटाटा हाताने कुस्करून या मसाल्यावर घालावा. मटार घालावेत. कोथिंबीर व चवीनुसार मीठ घालून छान एकजीव करून घ्यावे. या मिश्रणाला एक वाफ येऊ द्यावी. मग एका ताटामध्ये हे मिश्रण काढून घेऊन गार करून घ्यावे. मिश्रण गार झाले की एका कढईमध्ये तळणीसाठी तेल तापत ठेवावे. एका पसरट ताटामध्ये दुध घालावे. ब्रेड स्लाईसच्या कडा काढून ते दुधामध्ये हलक्या हाताने भिजवून घ्यावेत. स्लाईस दुधातून अगदी लगेच काढून घ्यावेत. ते ओलसर झाले पाहिजेत. दोन्ही हातात स्लाईस धरून ज्यादाचे दुध पिळून घ्यावे. मग त्या स्लाईसमध्ये बटाट्याचे सारण भरावे. स्लाईसची एक बाजू पकडून घट्ट गुंडाळी करायला सुरुवात करावी. हे स्लाईस दुधात भिजवल्याने ते पटकन रोल होतात. छान  घट्ट रोल तयार झाला की तेलामध्ये खरपूस बदामी रंगावर टाळून घ्यावा. अशाप्रकारे सगळे स्लाईस रोल टाळून घ्यावेत व सॉससोबत serve करावेत. 

वाढणी :- २ ते ३ माणसे 

जिलबी

साहित्य :-

१. अर्धा कप मैदा 

२. पाव चमचा यीस्ट 

३. १ कप साखर 

४. पाऊण कप पाणी 

५. अर्धा चमचा वेलची पूड 

६. चिमुटभर केशर 

७. तळणीसाठी तेल 

कृती:-

प्रथम यीस्ट २ ते ३ चमचा कोमट पाण्यात भिजवून ठेवावे. १० मिनिटांनी मैद्यामध्ये तेयीस्ट घालून मिक्स करून घ्यावे. त्यानंतर  हळू हळू पाणी घालून  भज्याच्या घट्ट पिठासारखे पीठ बनवावे. हे पीठ थोडावेळ झाकून ठेवावे. तोवर साखर व पाणी एकत्र करून पाक बनवून घ्यावा. वेलची पूड व केशर घालावे.  नंतर एका आडव्या पातेल्यामध्ये तेल तापवावे. जिलबी बनवण्यासाठी जी बाटली मिळते त्यात किंवा सॉसच्या बाटलीमध्ये  मिश्रण घालावे. यापैकी काहीच उपलब्ध नसेल तर झिप लॉकच्या पिशवीमध्ये मिश्रण घालून एका कोपऱ्यामध्ये छोटेसे भोक पडावे. त्यातून जिलबी येते. पातेल्यातील तेल जास्त ताप देऊ नये. तेलामध्ये थोडेसे मिश्रण घालून बघावे. जर थोड्यावेळाने टाकलेले मिश्रण आपोआप वर आले तर तेल योग्य तापले आहे असे समजावे. मग तेलामध्ये चकली घालतो तशाप्रकारे गोल गोल बाटली फिरवत जिलबी घालावी. दोन्ही बाजूनी तळून घ्यावी. मग कोमट झालेल्या पाकात अगदी थोडावेळ बुडवून ठेवावी. दोन्ही बाजूनी पाकात घोळवून घेतली की जिलबी तयार झाली. वरून सजावटीकरता ड्राय फ्रुट्स घालाव्यात. गरम गरम जिलबी serve करावी. 

वाढणी :- वरील साहित्यात १५ ते २० जिलब्या होतील. 

टोमॅटो रवा डोसा

साहित्य:-

१. २ टोमॅटो

२. १ कप रवा 

३. पाव कप डाळीचे पीठ 

४. अर्धा चमचा तिखट 

५. अर्धा चमचा धणेपूड 

६. अर्धा चमचा जीरंपूड 

७. पाव चमचा ओवा 

८. चवीनुसार मीठ 

९. कोथिंबीर 

१०. किसलेलं आलं लसूण प्रत्येकी अर्चा चमचा 

११. अर्धा ते एक कप पाणी 

कृती:-

टोमॅटो मिक्सरमधून काढून घ्यावेत. त्यात रवा, बेसन. व  इतर सर्व जिन्नस घालावेत. डोश्याच्या पिठाप्रमाणे दाटसर बॅटर बनवून घ्यावे. तवा तापला की या पिठाचा त्यावर जाडसर डोसा घालावा. बाजूने तेल सोडून एका बाजूने छान परतून घ्यावा. उलटून दुसऱ्या बाजूने पण भाजून घ्यावा. पुदिन्याच्या चटणीसोबत किंवा सॉस बरोबर हा डोसा serve करावा. हा डोसा लहानमुलंदेखील आवडीने खातात. 

वाढणी:- ५ ते ६ डोसे. 

छोले राजमा सलाड

साहित्य :-

१. लाल सिमला मिरची 

२. भिजवून शिजवलेला राजमा 

३. भिजवून शिजवलेले छोले 

४. अर्धा कप बारीक चिरलेला कांदा 

५. १ चमचा लिंबाचा रस 

६. अर्धा चमचा लाल तिखट किंवा १ बारीक चिरलेली हिरवी मिरची 

७. चवीनुसार मीठ 

८. अर्धा चमचा तेल 

कृती :-

राजमा व छोले वेगवगळे भिजववेत. ७ ते ८ तास भिजले की वेगवेगळे शिजवून घ्यावेत. शिजल्यावर त्यातील पाणी काढून घ्यावे. लाल सिमला मिरचीला हाताने थोडे तेल लावून घ्यावे. सिमला मिरची काट्याचमच्यामध्ये खोचावी व थेट आचेवर धरावी. मिरची सगळीकडून काळे डाग पडून भाजली गेली पाहिजे. असं झाल्यावर ती मिरची पाण्यात घालावी व जळालेला पापुद्रा काढून घ्यावा. सिमला मिरचीचे बारीक तुकडे करून घ्यावेत. त्यानंतर एका बाऊलमध्ये छोले, राजमा, कांदा, सिमला मिरची, तिखट किंवा हिरवी मिरची, लिंबाचा रस व चवीनुसार मीठ घालून सर्व जिन्नस एकत्र करून घ्यावेत. हे सलाड खास वजन कमी करू पाहणाऱ्यांसाठी तर फारच उपयोगाचे आहे. 

वाढणी:- २ ते ३ माणसे 

मसूर भात

साहित्य:-

१. भिजवलेले अक्खे मसूर १ कप 

२. उभा चिरलेला कांदा अर्धा कप 

३. किसलेलं आलं अर्धा चमचा 

४. हळद अर्धा चमचा 

५. धणे पूड १ चमचा 

६.जीरं पूड अर्धा चमचा 

७. बिर्याणी मसाला १ चमचा 

८. २ सुक्या लाल मिरच्या 

९. भिजवलेला तांदूळ दीड कप 

१०. चवीपुरते मीठ 

११. सजावटीसाठी कोथिंबिर 

कृती:-

मसूर ७ ते ८ तास पाण्यात भिजवून ठेवावेत. नंतर एका कढईमध्ये तेल घेऊन त्यात जीरं व मोहरीची फोडणी करावी. सुक्या लाल मिरच्या घालावयात.  मोहरी तडतडली की त्यात उभा चिरलेला कांदा घालून तो मऊ होईपर्यंत परतावा. आलं घालून पुन्हा परतावा.  मग त्यात  भिजवलेले मसूर घालावेत. थोडावेळ परतून मग त्यात हळद, धणे जीरं पूड व बिर्याणी मसाला घालावा.  तांदूळ कृती सुरु करण्यापूर्वी भिजवावेत. म्हणजे १५ मिनिटे तांदूळ पाण्यात भिजतील. सगळे मसाले घालून २ ते ३ मिनिटे मसूर परतले की मग त्यात भिजवलेला तांदूळ घालावा. तांदळाच्या दुप्पट पाणी घालावे व चवीनुसार मीठ घालून भात शिजवावा. भाताला उकळी आल्यावर आच मंद करून १० मिनिटे भात झाकण लावून शिजवावा. कोथिंबिर घालून हा भात दह्यासोबत किंवा रायत्या सोबत serve करावा . 

वाढणी :- २ ते ३ माणसे. 

व्हेज हंडी बिर्याणी!!

साहित्य :-

१. १ वाटी चौकोनी चिरलेलं गाजर 

२. १ वाटी चिरलेला श्रावण घेवडा 

३. १ वाटी चिरलेला फ्लॉवर 

४. १ वाटी मटारचे दाणे 

५. फोडणीसाठी तेल 

६. अर्धा चमचा शाही जिरं 

७. आलं लसूण पेस्ट प्रत्येकी अर्धा चमचा 

८. १ वाटी बारीक चिरलेला कांदा 

९. १ वाटी बारीक चिरलेला टोमॅटो

१०. १ ते २ हिरव्या मिरच्या 

११. अर्धा चमचा हळद 

१२. १ चमचा तिखट 

१३. १ चमचा धने पूड 

१४. १ वाटी घुसलेलं दही 

१५. पाव वाटी तूप 

१६. चिमूटभर केशर दूधात भिजवलेलं 

१७. अर्धा वाटी तळलेला कांदा 

१८. खडा मसाला :- वेलची, लवंग, तमालपत्र, मिरी, मसाला वेलची 

१९. २ कप भिजवलेला बासमती तांदूळ 

२० चवीनुसार मीठ 

२१. बारीक चिरलेला पुदिना व कोथिंबीर प्रत्येकी अर्धी वाटी 

२२. गरम मसाला १ चमचा 

कृती :-

प्रथम एका भांड्यामध्ये पाणी गरम करावे. त्यात चवीनुसार मीठ व खडा मसाला घालावा. भिजवलेले तांदूळ घालावेत. भात शिजत आला की उपसावा. पुन्हा एका भांड्यामध्ये पाणी तापवावे. त्यात चवीनुसार मीठ घालून गाजर, फ्लॉवर, श्रावण घेवडा व थोड्यावेळाने मटार घालावेत. या भाज्या थोड्या शिजेपर्यंत उकडून घ्याव्यात. भाज्या शिजत आल्या की उपासाव्यात. एका भांड्यात तेल तापवावे. त्यात शाही जीरं घालावं. जीरं तडतडलं की त्यात कांदा घालावा. आलं लसूण पेस्ट घालून १ मिनीटभर परतावं. त्यात टोमॅटो घालून तो मऊ शिजेपर्यंत परतावा. मग त्यात मसाले अर्थात हळद, तिखट व धणे पूड घालावी. मसाले परतून घ्यावेत.  त्यात दही घालावं व शिजलेल्या भाज्या घालून गरज असल्यास थोडासा मीठ घालून थोडावेळ शिजवावं. आता एका पातेल्यात खाली भाजीचा एक थर घालावा. वर भाताचा एक थर घालावा. त्यावर थोडा गरम मसाला, पुदिना, व कोथिंबीर घालावी. पुन्हा राहिलेल्या भाजीचा थर घालावा. भाताचा थर घालावा. वरून गरम मसाला, पुदिना व कोथिंबीर घालावी. तळलेला कांदा घालावा. वरून केशराचं दूध घालावं. तूप घालावं, काजूचे तुकडे व बेदाणे घालून बिर्याणी आचेवर ठेवावी. प्रथम पहिले १० मिनिटंमोठ्या आचेवर ठेवावी व नंतर मंद आचेवर १५ मिनिटं ठेवावी. बिर्याणी तयार!! 

वाढणी :- ३ ते ४ माणसे 

पनीर पुलाव

साहित्य :-

१. १ कप भिजवलेला बासमती तांदूळ 

२. १ कप चौकोनी कापलेले पनीर 

३. अर्धा चमचा किसलेलं आलं

४. अर्धा चमचा किसलेलं लसूण 

५. अर्धा ते १ चमचा वाटलेली हिरवी मिरची 

६. १ चमचा गरम मसाला 

७. २ चमचे दही 

८. ३ चमचे टोमॅटो केचअप 

९. चिरलेली कोथिंबीर 

१०. चवीनुसार मीठ 

११. अर्धा कप उभा चिरलेला कांदा 

१२. फोडणीसाठी तेल व बटर प्रत्येकी १ चमचा 

१३. २ कप गरम पाणी 

१४. चिमुटभर साखर 

कृती:-

प्रथम कुकरमध्ये थोडं तेल व बटर घालावं. दोन्ही तापलं की मग त्यात कांदा घालावा. कांदा मऊ होईपर्यंत परतावा. मग त्यात आलं, लसूण, व हिरवी मिरची घालावी. छान मिक्स करून घ्यावे. मग त्यात टोमॅटो केचअप घालावे. थोडा परतून लगेचच भिजवलेला तांदूळ घालावा. परतून घ्यावे. मग पनीरचे तुकडे घालून हलक्या हाताने मिक्स करावे. गरम पाणी घालून तांदूळ नीट ढवळून घ्यावा. मग त्यात मीठ, दही व गरम मसाला घालावा. चिमुटभर साखर घालावी व ढवळून घेऊन पाण्याची चव घेऊन बघावी. कुकरचे झाकण लावून २ शिट्ट्या करून घ्याव्यात. कुकरची वाफ दडपली की भात हलक्या हाताने मोकळा करून घ्यावा. serve करताना वरून बारीक चिरलेली कोथिंबीर घालावी.

वाढणी :- ३ ते ४ माणसे 

बटाटा वडा सांबार

वड्यासाठीचे साहित्य :-

१. उकडलेले बटाटे ३ ते ४

२. २ हिरव्या मिरच्या 

३.  आलं, लसूण प्रत्येकी २ चमचे

४. कोथिंबीर 

५. चवीनुसार मीठ 

६. अर्धा कप डाळीचं पीठ 

७. अर्धा चमचा तिखट 

८. पाव चमचा खायचा सोडा 

९. चवीनुसार मीठ 

१०. १ ते सव्वा कप पाणी 

सांबारचे  साहित्य :-

११. १ कप भिजवलेली तुरीची डाळ 

१२. १ ते २ लहान वांगी 

१३. पाव कप चिरलेला दुध्या 

१४. ४ ते ५ भेंड्या 

१५. अर्धा कप उभा चिरलेला कांदा 

१६. १ मध्यम आकाराचा टोमॅटो बारीक चिरून

१७. अर्धा चमचा तिखट 

१८. १ चमचा धणे पूड 

१९. अर्धा चमचा जीरं पूड 

२०. १ चमचा सांबार मसाला 

२१. अर्धा चमचा हळद 

२२. कढीपत्त्याची पाने 

२३. शेवग्याच्या शेंगा २

कृती :-

उकडलेले बटाटे हाताने कुस्करून घ्यावेत. त्यात हिरवी मिरची, आलं व लसूण वाटून घालावं. त्यात चवीनुसार मीठ व कोथिंबीर घालून व्यवस्थित एकजीव करून घ्यावं. त्याचे गोळे करून घ्यावेत. डाळीच्या पिठात तिखट, मीठ, सोडा व हळद घालावी. थोडं थोडं पाणी घालत दाटसर असा घोळ बनवून घ्यावा. गुठळ्या होऊ देऊ नयेत. ५ मिनिटे थांबून मग वडे करायला घ्यावेत. कढईमध्ये तेल तापवावे. बटाट्याचा प्रत्येक गोळा डाळीच्या पिठामध्ये घोळवून तेलात सोडवा. मध्यम आचेवर छान सोनेरी रंगावर वडे टाळून घ्यावेत. तोवर कुकरमध्ये तेल तापवावे. त्यात मोहरी,कढीपत्ता व हळद घालून फोडणी करावी. त्यात कांदा मऊ होईपर्यंत परतावा. धणे जीरं पूड, तिखट, सांबार मसाला व रंगासाठी पाप्रिका घालावं. मसाला थोडा परतून त्यात टोमॅटो घालावेत. ते परतले की मग भाज्या घालाव्यात. तुरीची भिजवलेली डाळ त्यात घालावी. शेवग्याच्या शेंगाही घालाव्यात. डाळीच्या दुप्पट पाणी घालावं व मीठ घालून कुकर बंद करावा व ३ शिट्ट्या करून घ्याव्यात. सांबार तयार झाला की त्याचा दाटपणा तपासून घ्यावा. आवश्यक वाटल्यास थोडं पाणी घालून सांबार पुन्हा उकळून घ्यावं. आता एका बाऊल मध्ये पहिले वडा घालून त्यावर सांबार घालावा. वरून कोथिंबीर व शेव घालून गरम गरम serve करावे.

थंडीच्या दिवसात किंवा पाऊस पडत असताना असा गरम गरम वडा सांबार अधिकच चविष्ट लागतो.

वाढणी:- २ ते ३ माणसे.

रव्याचे पॅनकेक

साहित्य :-

१. २ कप रवा 

२. पाऊण कप दही 

३. अर्धा कप पाणी 

४. १ छोटं गाजर किसून 

५. अर्धी वाटी बारीक चिरलेला कोबी 

६. बारीक चिरलेली हिरवी मिरची किंवा तिखट चवीनुसार 

७. चवीनुसार मीठ 

८. फ्रुट सॉल्ट १ चमचा 

९. १ चमचा किसलेलं  आलं 

कृती :-

एका बाऊलमध्ये रवा, दही व पाणी एकत्र करून घ्यावे व अर्धा तास ठेवून द्यावे. अर्ध्या तासाने त्यात किसलेलं गाजर, चिरलेला कोबी, आलं, मिरची किंवा तिखट आणि चवीनुसार मीठ सर्व घालून मिश्रण छान एकजीव करावं.  त्यात एक चमचा  फ्रुट सॉल्ट घालून लगेचच त्यावर ४ ते ५ चमचे पाणी घालावं. त्याने  फ्रुट सॉल्ट फसफसेल. यानंतर अतिशय हलक्या हाताने हे बॅटर एकजीव करावे. हे बॅटर डोश्याच्या बॅटरपेक्षा थोडे घट्ट असते. आता एका पॅनमध्ये छोटे छोटे पॅनकेक घालावेत व मध्यम आचेवर तेल सोडून परतून घ्यावेत. हे पॅनकेक लहान मुलांसाठी अतिशय healthy आहेत. कुठल्याही हिराव्या चटणीसोबत खावयास द्यावेत.

हे पॅनकेक लाल टोमॅटोच्या हिरव्या चटणीसोबत अतिशय चविष्ट लागतात. या चटणीची कृती ब्लोगवर नक्की पहा.

वाढणी :- वरील साहित्यात ८ ते १० छोटे पॅनकेक होतील.

करंजी

साहित्य :-

१. २ कप खोवलेलं ओलं खोबरं 

२. २ कप + १/४ कप साखर (ज्यांना कमी गोड आवडतं त्यांनी जेवढं खोबरं त्यापेक्षा थोडी कमी साखर घ्यावी.)

३. अर्धा चमचा वेलची पूड 

४. १ कप मैदा 

५. २ चमचे बारीक रवा 

६. ४ चमचे तुपाचे मोहन 

७. चिमुटभर मीठ 

कृती:-

मैदा व रवा एकत्र करून त्यात तुपाचे मोहन व चिमुटभर मीठ घालावे. हे सगळे तूप मैद्यामध्ये एकजीव करून घ्यावे. थोडं थोडं पाणी किंवा दुध घालत घट्ट कणिक मळून घ्यावी. ही कणिक झाकून ठेवावी. खोबरं व साखर एकत्र करून शिजायला ठेवावं. मध्यम आचेवर हे मिश्रण सतत ढवळत शिजवावं. हे सारण थोडं दाट व्हायला लागेल. कढईच्या कडा सुटायला लागल्या की सारण तयार झालं. हे सारण गार होऊ द्यावं. मग मैद्याची मळलेली कणिक घेऊन ती पुन्हा एक ५ मिनिटे छान मळून घ्यावी. त्याचे छोटे छोटे गोळे करून घ्यावेत. एक गोळा घेऊन तो पुरीसारखा लाटून घ्यावा. त्यात खोबऱ्याचे सारण भरून अर्धगोलामध्ये कारंजी बंद करून घ्यावी. या बंद बाजूला कातण्याने अगदी बाहेरच्या बाजूने कापून घ्यावे. कातण नसेल तर काटेचमच्याने बंद बाजू दाबून घ्यावी. या तयार करंज्या ओलसर फडक्याखाली ठेवाव्यात. कढईमध्ये तेल तापवून या करंज्या बदामी रंगावर परतून घ्याव्यात. करंज्या केल्या की नेहेमी एखादा मोदक करावा.

वाढणी :- या साहित्याच्या १२ ते १५ करंज्या होतील.

पातळ पोह्यांचा चिवडा

साहित्य :-

१. ३ कप पातळ पोहे 

२. १ कप चुरमुरे 

३. १० ते १२ कढीपत्त्याची पाने 

४. मुठभर दाणे 

५. मुठभर डाळं 

६. चवीनुसार हिरव्या मिरच्या 

७. अर्धा चमचा हिंग 

८. १ चमचा साखर 

९. तेल व फोडणीचे साहित्य 

१०. चवीनुसार मीठ 

११. १ चमचा हळद 

कृती:-

प्रथम पातळ पोहे चाळणीतून हलक्या हाताने चाळून घ्यावेत. एका कढईमध्ये हे पातळ पोहे कुरकुरीत होईपर्यंत परतून घ्यावेत. एका वर्तमानपत्रावर पोहे काढून घ्यावेत. चुरमुरे देखील थोडे परतून घ्यावेत व पोह्यांवर घालावेत. मग कढईमध्ये भरपूर तेल घेऊन त्यात मोहरी, हिंग, कढीपत्ता, मिरची व हळद  हे सर्व घालून फोडणी करून घ्यावी. त्यात दाणे व डाळं घालून ते परतलं गेलं की ही फोडणीदेखील पोह्यांवर घालावी. मग त्यात साखर व मीठ घालून हलक्या हाताने सर्व पदार्थ मिक्स करावेत. या पोह्यांमध्ये सुक्या खोबऱ्याचे काप सोनेरी रंगावर तळून घालतात. फोडणी करायच्या आधी हे खोबरं तळून पोह्यांवर घालावं. अतिशय खरपूस चिवडा तयार. चुकून जर मिठाचा अंदाज चुकला व चिवडा खारट झाला तर थोडे चुरमुरे भाजून घालावेत. खारटपणा कमी होतो.

वाढणी  :- ४ ते ५ माणसे 

रवा खोबरं लाडू

साहित्य :-

१. २ कप बारीक रवा 

२. अर्धा कप किसलेलं ओलं खोबरं 

३. अडीच कप साखर 

४. थोडं पाणी पाक बनवण्यासाठी 

५. १ चमचा वेलची पूड 

६. चिमुटभर केशर 

७. अर्धी ते पाउण वाटी तूप 

८. बेदाणे 

कृती :-

प्रथम एका पातेल्यात तूप गरम करून त्यावर रवा मध्यम आचेवर खरपूस भाजून घ्यावा.  मग त्यात किसलेलं ओलं खोबरं घालून पुन्हा थोडावेळ परतून घ्यावं. खोबरं घातल्यावर रवा थोडा फुलायला लागेल. एक ५ ते १० मिनिटे परतल्यावर आच बंद करावी. रवा भाजून घेईपर्यंत दुसऱ्या पातेल्यामध्ये साखर घेऊन ती बुडेल इतपत पाणी घालून १ तरी पाक करायला ठेवावा. एकतरी पाक व्हायला साधारणपणे १० ते १५ मिनिटे लागतील. पाक थोडा दाटसर झाला की कणभर पाक दोन बोटांमध्ये धरून त्याला एक तार येते का ते बघावे. तसे झाल्यास पाक तयार झाला असे समजावे. मग त्यात वेलची पूड व केशर घालावे. केशर आधी घातले तर पाकाचा रंग बदलतो म्हणून पाक तयार झाला की केशर घालावे. मग या पाकामधे भाजलेलं रवा खोबरं घालून मिश्रण छान मिक्स करून घ्यावं. या क्षणी हे मिश्रण खूप सैलसर वाटेल पण हे लाडू लगेच वळायचे नसतात. लाडवाचं मिश्रण तयार झालं  की  ते २ ते ३ तास ठेवावं. ३ तासाने हे मिश्रण व्यवस्थित घट्ट झालेलं असेल. फक्त या २ ते ३ तासात मिश्रण मधून मधून ढवळून घ्यावं. आता घट्ट झालेल्या मिश्रणाचे मध्यम आकाराचे लाडू वळावेत व सजावटीसाठी त्यावर बेदाणे लावावेत.

वाढणी :- या साहित्याचे १६ ते २० लाडू तयार होतील.

शंकरपाळी

साहित्य :-

१. १ कप दूध 

२. १ कपापेक्षा थोडीशी जास्त साखर 

३. १ कप तूप 

४. चिमुटभर मीठ 

५. मैदा साधारणपणे ३ ते ४ कप 

६. तळणीसाठी तेल 

कृती:-

एका पातेल्यामध्ये दुध, साखर व तूप एकत्र करून गरम करण्यास ठेवावे. त्यात चिमुटभर मीठ घालावे. या मिश्रणाला उकळी आली की आच बंद करून त्यात हळू हळू मैदा घालण्यास सुरुवात करावी. अगदी पोळीच्या कणकेसारखी पातळ कणिक तयार झाली की ती झाकून ठेवावी. २ ते ३ तासांनी ही कणिक घट्ट झालेली असेल. आता ही कणिक पुन्हा थोडी मळून  घ्यावी. मळताना जर असे वाटले की कणिक परातीला किंवा ओट्याला चिकटत आहे तर त्यात २ चमचे तांदुळाची पिठी किंवा कॉर्नफ्लोर घालावे व कणिक मळावी. मग या कणकेचे मोठो गोळे करून ते पराठ्याप्रमाणे जाडसर लाटून घ्यावेत. कातण्याने किंवा सुरीने या लाटलेल्या पोळीचे चौकोनी तुकडे करावेत. या शंकरपाळ्या एका ताटामध्ये काढून घ्याव्यात. सगळ्या कणकेच्या शंकरपाळ्या तयार झाल्या की तेलामध्ये हळूहळू थोड्या थोड्या शंकरपाळ्या सोडून सोनेरी रंगावर तळून घ्याव्यात. शंकरपाळ्या सोनेरी झाल्या की लगेचच तेलातून काढाव्यात. तेलातून काढल्यानंतर देखील त्या थोड्या जास्त रंग पकडतात. शंकरपाळ्या तळताना तेल कमी पडणार नाही याची काळजी घ्यावी. नाहीतर शंकरपाळ्या तेलात विरघळू शकतात.

वाढणी :- या साहित्याच्या मध्यम आकाराचा डबा भरेल एवढ्या शंकरपाळ्या होतील.