पनीर

साहित्य :-

१. ४ कप दूध

२. १/४ कप लिंबाचा रस

३. अर्धा कप पाणी

कृती :-

जाड बुडाच्या पातेल्यामध्ये दूध उकळत ठेवावे. दूध पातेल्याला खाली चिकटणार नाही याची सतत काळजी घ्यावी. आच मध्यम असू द्यावी. दुधाला उकळी आली की आच मंद करावी. लिंबू रस पाण्यामध्ये एकत्रित करून हळूहळू उकळी आलेल्या दूधात घालावे. दूध सतत ढवळावे. थोडेसे ढवळल्यावर पनीर व पाणी वेगवेगळे होताना दिसू लागेल. आच बंद करावी. थोडासा वेळ दूध ढवळावे. एका चाळणीत एक पातळ कापड घालून हे पनीर गाळून घ्यावे. (गाळून शिल्लक राहिलेले पाणी पोळीची कणिक मळायला वापरले जाऊ शकते.) या गाळलेल्या पनीर वर गार पाणी सोडावे. गार पाणी सोडल्याने पनीर घट्ट होत नाही. कापदातले पनीर घट्ट पिळून घ्यावे. कापडासकट एका परातीत ठेवून त्यावर वजनदार असे काहीही ठेवावे. म्हणजे पनीर मधील उरले सुरले पाणी देखील निघून जाईल. ५ ते १० मिनिटांनी या पनीरचे तुम्हाला हवे तसे तुकडे करावेत.