मेथी चिकन

साहित्य :-

१. चिकन थाईज ४ ते ५

२. १ मोठा कांदा बारीक चिरून

३. १ मोठा टोमॅटो बारीक चिरून

४. ४ ते ५ लवंगा

५. ४ ते ५ अक्खी वेलची

६. दालचिनी तुकडा

७. आलं लसूण पेस्ट प्रत्येकी १ चमचा

८. कसुरी मेथी १/४ कप

९. चवीपुरतं मीठ

१०. तिखट पूड १ चमचा

११. धणे जिरे पूड प्रत्येकी १ चमचा

१२. गरम मसाला अर्धा चमचा

१३. हळद अर्धा चमचा

१४. सजावटीसाठी कोथिंबीर

कृती:-

प्रथम चिकन स्वच्छ धुवून घ्यावं. नंतर एका कढईमध्ये तेल घेऊन ते गरम झालं की त्यात वेलची, लवंग व दालचिनी घालावी. मग  त्यात कांदा घालावा. थोडा परतल्यावर आलं लसूण पेस्त घालावी. ही पेस्ट थोडी परतली की मग त्यात हळद, धणे जिरे पूड घालावी. थोडं परतावं व त्यात टोमॅटो घालावा. थोडंसं पाणी घालून झाकण ठेवून टोमॅटो छान  मॅश होईपर्यन्त शिजवावा. मग या ग्रेव्ही मध्ये तिखट व गरम मसाला घालावा. छान मिक्स करून मग त्यात चिकन घालावा. परत एकदा मिक्स करून झाकण ठेवून चिकन शिजू दयावं.  मधून मधून चिकन परतावं व आवश्यक वाटल्यास पाणी घालावं. चिकन ८०% शिजलं की त्यात कसुरी मेथी घालावी. मेथी घालताना हातावर एकदा चोळावी जेणेकरून त्याची छान पूड होईल. चवीपुरतं मीठ घालून पुन्हा एकदा सर्व जिन्नस मिक्स करून झाकण लावून शिजवावेत. गरम गरम मेथी चिकन रोटी, नान अथवा पराठ्यासोबत serve करावं.

वाढणी  :- ३ ते ४ माणसे

दाल बाटी

साहित्य :-

१. १ कप गव्हाची कणिक

२. पाव कप रवा

३. अर्धा चमचा ओवा

४. ४ ते ५ चमचे तेलाचे मोहन

५. चवीनुसार मीठ

६. तुरीची दाल अर्धा कप

७. अर्धा कप मुग दाल

८. कढीपत्ता

९. लाल मिरच्या ३ ते ४

१०. आलं, लसूण प्रत्येकी पेरभर

११. पाव कप कांदा बारीक चिरून 

१२. १ चमचा हळद

१३. फोडणीसाठी तेल व जीरं 

कृती :-

प्रथम गव्हाची कणिक, रवा व ओवा मिक्स करून घ्यावे व त्यात तेलाचे मोहन व चवीनुसार मीठ घालावे. थोडी हळद घालावी. पाणी घालत घालत याचा छान गोळा मळून घ्यावा. कुकरच्या एका भांड्यामध्ये हा गोळा व एका भांड्यात तूर व मुग डाळ एकत्र करून ३ शिट्ट्या करून घ्याव्या. शिजलेला बाटीचा गोळा छोट्या छोट्या वड्यामध्ये कापून घ्यावा व तेलावर तळून घ्यावा. एका कढईमध्ये तेल तापवावे व त्यात जीरं, लाल मिरच्या, कढीपत्ता घालून फोडणी करावी. हळद घालावी व कांदा घालून परतावे. आलं , लसूण घालून मिनिटभर पुन्हा परतून घ्यावे. कांदा छान मऊ झाला की त्यात शिजलेल्या डाळी घालाव्यात. थोडं पाणी व चवीनुसार मीठ घालून या वरणाला छान उकळी आणावी. कोथिंबीर घालावी. दाल बाटी serve करताना बाटी मोडून कुस्करावी व त्यावर वरण, तूप, व लिंबू पिळून घालावे. छान, खुसखुशीत दाल बाटी गरम असताना खावी. 

वाढणी :- २ ते ३ माणसे 

शेवयांचा उपमा

साहित्य :-

१. १ कप बोम्बिनो शेवया 

२. २ मोठे चमचे स्वीट कॉर्न 

३. २ मोठे चमचे चमचे मटार

४. २ मोठे चमचे चौकोनी कापलेले गाजर

५. फोडणीसाठी तेल

६. २ हिरव्या मिरच्या 

७. चवीनुसार मीठ 

८. बारीक चिरलेला कांदा पाव कप

९. पेरभर किसलेला आलं 

१०. खवलेलं खोबरं आणि कोथिंबीर सजावटीसाठी 

कृती :-

प्रथम एका पातेल्यात पाणी उकळत ठेवावे. पाण्याला उकळी आली की त्यात चवीनुसार मीठ व शेवया घालून साधारणपणे ४ ते ५ मिनिटे शिजवून घ्यावे. नंतर लगेचच या शेवया गाळून घ्याव्यात. त्याच्यावर गार पाणी सोडावे व थोडेसे तेल घालून हळुवार हाताने मिक्स करून घ्यावे. असे केल्याने शेवया एकमेकाला चिकटणार नाहीत. मग एका कढईमध्ये तेल तापवून घ्यावे. त्यात फोडणी करावी. फोडणीमध्ये हिरवी मिरची व आलं घालावं. आवडत असल्यास शेंगदाणे देखील घालावेत. थोडंसं परतून मग कांदा घालावा. कांदा मऊ झाला की हळद व सगळ्या भाज्या घालाव्यात व थोडंसं मीठ व पाणी घालून भाज्या शिजवून घ्याव्यात. हे मीठ केवळ भाज्यांपूरतच घालावं. जर फ्रोझन मटार व स्वीट कॉर्न वापरलं तर शिजायला फारसा वेळ लागत नाही. भाज्या शिजल्या आणि पाणी आटलं की मग शेवया घालाव्यात व अगदी हलक्या हाताने सर्व मिक्स करून घ्यावं. serve करताना वरून खोबरं व कोथिंबीर घालावी आणि गरम गरम serve करावं. 

वाढणी :- २ ते ३ माणसे 

नारळाची बर्फी

साहित्य :-

१. खवलेला नारळ २ कप

२. साखर दीड कप

३. फेटलेली दाट साय किंवा फ्रेश क्रीम २ ते ३ चमचे

४. वेलची पूड अर्धा चमचा

५. आवडीनुसार ड्रायफ्रुट्स 

६. चिमूटभर केशर 

कृती :-

खवलेला नारळ, साखर व फेटलेली साय किंवा फ्रेश क्रीम सर्व एका कढईमध्ये एकत्र करावे.  मध्यम आचेवर हे सर्व मिश्रण शिजवावे. साखर विरघळली की हे मिश्रण थोडे सैल होते. यावेळी वेलची पूड व केशर घालावे. त्यानंतर एक ५ मिनिटे शिजवले की मिश्रण कढईच्या कडेने सुटायला लागते व दाट व्हायला लागते. असे झाले की लगेचच आच बंद करून तूप लावलेल्या एका तटावर हे मिश्रण जाडसर पसरून घ्यावे. त्यावर लगेचच  ड्रायफ्रुट्स घालावीत व हाताने थोडेसे दाबावे. ही बर्फी थोडी गार झाली की सुरीने त्याच्या वड्या पडून घ्याव्या. बर्फी पूर्ण गार झाली की मगच उचलावी.

वाढणी  :- या साहित्यात साधारणपणे १२ ते १५ वड्या होतील.

बटाटा वडा

साहित्य :-

१. उकडलेले बटाटे ३ ते ४

२. ४ हिरव्या मिरच्या 

३. ४ ते ५ लसूण पाकळ्या 

४. पेरभर आल्याचा तुकडा 

५. कोथिंबीर

६. ५ ते ६ चमचे डाळीचे पीठ/ बेसन 

७. अर्धा चमचा तिखट

८. पाव चमचा हळद

९. चिमूटभर बेकिंग सोडा

१०. चवीनुसार मीठ

११. तळणीसाठी तेल

कृती:-

प्रथम उकडलेले बटाटे हाताने मॅश करून घ्यावेत. हिरवी मिरची, लसूण व आलं मिक्सरमध्ये वाटून घ्यावं. तेलावर हे वाटलेलं आलं, लसूण व मिरची थोडसं परतून घ्यावं. त्यात चिमूटभर हळद घालावी. मॅश केलेला बटाटा घालावा व लगेचच आच बंद करावी. थोडी कोथिंबीर घालून या मिश्रणाचा छान गोळा करून घ्यावा.  मग बेसन, तिखट, सोडा, हळद व मीठ हे सर्व एकत्र करावं. थोडं थोडं पाणी घालत गुठळ्या होणार नाहीत अशा प्रकारे थोडं दाटसर पीठ बनवून घ्यावं. बटाट्याच्या मिश्रणाचे लहान मोठ्या आकाराचे गोळे करून घ्यावेत. एका कढईमध्ये तेल तापवून घ्यावं. आच माध्यमच ठेवावी.  बटाट्याचा एक गोळा बेसनाच्या मिश्रणात घोळवून तेलात सोडवा व छान खुसखुशीत वडे तळून घ्यावेत. केचअप बरोबर किंवा पुदिना कोथिंबिरीच्या चटणीसोबत गरम गरम serve करावेत. 

वाढणी :- २ ते ३ माणसे 

बनाना वॉल्नट ब्रेड

साहित्य :-

१. ३ पूर्ण पिकलेली केळी

२. २ कप मैदा

३. १/२ चमचा बेकिंग सोडा 

४. १/२ चमचा बेकिंग पावडर

५. १ चमचा  व्हॅनिला इसेन्स 

६. १/३ कप साखर

७. आवडत असल्यास पाव चमचा दालचिनीची पूड

८. २ अंडी

९. १/३ कप दही 

१०. बटर अर्धी स्टिक 

कृती :-

प्रथम केळी सोलून ती छान मॅश करून घ्यावी. दुसऱ्या बाउल मध्ये मैदा, बेकिंग पावडर, बेकिंग सोडा व साखर हे सर्व घालून छान मिक्स करून घ्यावं. केळी मॅश केलेल्या बाउल मध्ये बटर, व्हॅनिला इसेन्स, २ अंडी व दही घालावे आणि सर्व पदार्थ छान मिक्स करावेत. मग या मिश्रणात मैदा घालावा. सर्व मैदा एकाच वेळी घालू नये. थोडा थोडा मैदा केळ्याच्या मिश्रणात घालून मिक्स करून घ्यावे. मग त्यात तुकडे केलेले वॉल्नट घालावेत. या वेळेपर्यंत ओवन ३५०f ला preheat करून घ्यावा. ओवनच्या  एखाद्या नॉनस्टिक भांड्याला बटर लावावे व त्याच्यावर थोडासा मैदा भुरभुरावा. आपण तयार केलेले ब्रेडचे मिश्रण या ग्रीस केलेल्या भांड्यात ओतावे. हा ब्रेड बेक व्हायला साधारणपणे  ५० ते ५५ मिनिटे लागतील. ब्रेड तयार झाला की टूथपिक किंवा नाईफ मधोमध घालून बघावे. जर नाईफला ब्रेडचे मिश्रण लागले नाही तर ब्रेड तयार झाला असे समजावे. ब्रेड गार झाला की मग त्याचे slice करावेत. 

वाढणी :- २ ते ३ माणसे

तवा पुलाव

साहित्य :-

१. शिजवलेला भात २ कप

२. बारीक चिरलेली सिमला मिरची पाव कप

३. बारीक चिरलेलं गाजर व श्रावण घेवडा प्रत्येकी पाव कप

४. चौकोनी कापलेले पनीर पाव कप

५. मटारचे दाणे पाव कप

६. बारीक चीरालेला कांदा पाव कप

७. बारीक चिरलेले टोमॅटो अर्धा कप

८. टोमॅटो केचअप ३ ते ४ चमचे

९. पाव भाजी मसाला १ चमचा

१०. तिखट १ चमचा

११. चवीनुसार मीठ

१२. बारीक चिरलेली कोथिंबीर

कृती :-

प्रथम ४ ते ५ कप पाणी उकळावे. त्यात मीठ घालून २ कप तांदूळ शिजवून घ्यावेत. भात थोडा शिजला की जास्तीचे पाणी काढून घ्यावे. एका कढईमध्ये तेल घेऊन ते तापले की त्यात कांदा घालावा. चिरलेला टोमॅटो घालून दोन्ही छान मऊ होऊ द्यावे. मग त्यात टोमॅटो केचअप घालावे व इतर सर्व मसाले घालावेत. थोडंसं मीठ घालावं आणि कांदा टोमॅटो सर्व मसाल्यांमध्ये थोडं शिजवावं. मग त्यात भाज्या घालाव्यात व पाणी घालून भाज्या शिजवाव्यात. भाज्या अर्ध्या कच्च्या शिजल्या की त्यात भात घालावा आणि छान मिक्स करून घ्यावे. पनीर घालावे व भाज्या, भात, मसाले सर्व एकत्र ५ ते १० मिनिटे मंद आचेवर शिजवावे. कोथिंबीर घालून हा तवा पुलाव गरम गरम serve करावा.

वाढणी :- ३ ते ४ माणसे

पनीर झाल्फ्रेझी

साहित्य :-

१. उभी चिरलेली हिरवी सिमला मिरची १ कप

२. उभी चिरलेली लाल, पिवळी सिमला मिरची प्रत्येकी अर्धा कप

३. उभं चिरलेलं पनीर ३/४ कप

४. २ ते ३ हिरव्या मिरच्या

५. १ चमचा किसलेलं आलं

६. जीरं १ चमचा

७. हळद पाव चमचा

८. गरम मसाला १ चमचा

९. उभं चिरलेला कांदा १ कप

१०. उभा चिरलेला टोमॅटो

११. सजावटीसाठी बारीक कोथिंबीर चिरलेली व आलं उभं चिरलेलं

१२. मीठ चवीनुसार

कृती :-

प्रथम सर्व भाज्या, पनीर, कांदा, टोमॅटो व हिरव्या मिरच्या हे सर्व चिरून घ्यावं. टोमॅटो चिरताना त्यातल्या बिया पूर्णपणे काढून घ्याव्यात. सर्व तयारी झाली की एका कढईमध्ये तेल तापवावं. त्यात जीरं घालावं व ते थोडं परतलं की मग कांदा घालावा. कांदा मऊसर होयीपर्यंत परतावा. मग त्यात आलं व हिरवी मिरची घालावी व १ मिनिटभर परतावं. आता त्यात सर्व प्रकारच्या सिमला मिरची घालाव्यात. एक ५ मिनिट झाकण न लावता शिजवाव्यात. मध्ये मध्ये भाजी परतावी. मग त्यात हळद व गरम मसाला घालावा. थोडं अजून तिखट हवं असेल तर लाल तिखट घालावं. भाजी पुन्हा थोडावेळ परतावी. मग त्यात पनीर घालावं. पनीर घातल्यावर भाजी अतिशय हलक्या हाताने परतावी. मग त्यात टोमॅटो व मीठ घालून भाजी पुन्हा ५ मिनिटं शिजू द्यावी. कोथिंबीर व आलं पेरून भाजी गरम गरम serve करावी. ही भाजी गरम गरम फुलाक्यांसोबत फारच छान लागते. शिवाय रंगीत सिमला मिरची नसेल तर साधी नेहेमीची हिरवी सिमला मिरची वापरली तरी चालेल.

वाढणी :- २ ते ३ माणसे

पालक लच्छा पराठा

साहित्य :-

१. ब्लांच केलेला पालक २ कप

२. ३ ते ४ लसूण पाकळ्या

३. पेरभर आलं

४. २ ते ३ हिरव्या मिरच्या

५. साधारण ३ ते ४ कप कणिक

६. चवीनुसार मीठ

७. अर्धा चमचा ओवा

८. २ मोठे चमचे दही

९. बारीक चिरलेली पालकाची पाने अर्धा कप

कृती :-

प्रथम उकळत्या पाण्यात पालकाची पाने घालून ३ ते ४ मिनिटे छान शिजवून घ्यावीत. नंतर गरम पाण्यातून पालक काढून गार पाण्यामध्ये ५ मिनिटे ठेवावा. नंतर एका चाळणीमध्ये घेऊन पाणी पूर्ण निथळू द्यावे. मग ही पालकाची पाने, आलं, लसूण व मिरची मिक्सरमधून वाटून घ्यावी. या वाटलेल्या मिश्रणात कणिक, मीठ, ओवा व बारीक चिरलेली पालकाची पाने घालावीत व पोळीच्या कणकेप्रमाणे कणिक मळून घ्यावी. आवश्यक वाटल्यास कणकेचे प्रमाण कमी जास्त करावे. मळलेली कणिक अर्धा तास झाकून ठेवावी. लच्छा पराठा करायला घेताना प्रथम कणकेचे समान आकाराचे गोळे करून घ्यावेत. मग त्यातल्या एका गोळ्याला दोन्ही बाजूने कोरडं पीठ लावून पोळी लाटून घ्यावी. लाटलेल्या पोळीला तूप लावावे व थोडी पिठी भुरभुरावी. मग फोटोमध्ये दाखवल्याप्रमाणे केंद्रातून सुरीने कापून गुंडाळी करायला सुरुवात करावी. कोनाचा आकार आला की हाताने तो कोन twist कारावा व हळुवार हाताने खाली दबावा. फोटोमध्ये दाखवल्याप्रमाणे गोळा तयार झाला की तो बाजूला ठेवून द्यावा. अशाप्रकारे सगळे गोळे बनवून ते ५ ते १० मिनिटे थांबावे. मध्यम आचेवर तवा तापत ठेवून एक एक पराठा हलक्या हाताने लाटावा व तूप लावून दोन्ही बाजूनी खरपूस भाजून घ्यावा. थंडगार रायत्यासोबत गरम गरम लच्छा पराठा serve कारावा. याच कणकेचे तुम्ही साधे पालक पराठे देखील करू शकता पण हा लच्छा पराठा सध्या लाटलेल्या पराठ्यापेक्षा अतिशय मऊ होतो आणि त्याचे छान पदर सुटतात.

वाढणी :- ३ ते ४ माणसे

श्रीखंड / आम्रखंड

साहित्य :-

१. ४ ते ५ कप दही

२. दीड ते २ कप साखर

३. १ चमचा वेलची पूड

४. केशर चिमूटभर

५. १ चमचा चारोळी (ऐच्छिक)

कृती :-

एका कपड्यामध्ये दही गुंडाळून ते रात्रभर टांगून ठेवावा. म्हणजे दह्यातून सगळं पाणी निथळून जाईल आणि चक्का आपल्याला मिळेल. मग या चाक्क्यामध्ये साखर घालावी. साखर विरघळली की हा साखर घातलेला चक्का एका चाळणीमध्ये घेऊन हाताने दाबत दाबत फेटून घ्यावा. असं केल्याने अतिशय मऊसर आणि गुठळ्या नसलेले श्रीखंड तयार होईल. मग त्यात वेलची पूड, केशर आणि आवडत असल्यास चारोळी घालावी व पोळी किंवा पुरीसोबत serve करावे. जर याच चक्क्यामध्ये आंब्याचा पल्प घातला तर श्रीखंडाचे आम्रखंड तयार होईल. फक्त आम्रखंड केले तर त्यात वेलची पूड घालू नये. आंब्याचा स्वतःचाच स्वाद इतका छान असतो की त्याला इतर स्वादांची गरज भासत नाही.

जर तुम्ही दही टांगून ठेवायला विसरला असाल तर दही एका कापडात घ्यावं आणि वर्तमान पत्राचा एक गठ्ठा खाली ठेवून त्यावर कापडात गुंडाळून ठेवलेलं दही ठेवावं. वरून परत वर्तमान पत्राचा एक गठ्ठा ठेवावा आणि त्यावर जाड वजनदार वस्तू ठेवावी. १० ते १५ मिनिटांनी वर्तमान पत्र काढून ती बदलावीत. पुन्हा अशीच कृती २ वेळेला करावी. दह्यातलं पाणी निघून छान घट्ट चक्का तुम्हाला मिळेल.

वाढणी :- ३ ते ४ माणसे

हरा भरा कबाब

साहित्य :-

१. १ कप ब्लांच केलेला पालक

२. १ मध्यम आकाराचा उकडलेला बटाटा

३. अर्धी वाटी उकडून ठेचलेले मटार

४. बारीक चिरलेल्या हिरव्या मिरच्या २

५. अर्धा चमचा किसलेला आलं

६. ३ ते ४ चमचे कॉर्नफ्लोर

७. १ चमचा चाट मसाला

८. चवीनुसार मीठ

९. तळणीसाठी तेल

कृती :-

प्रथम पालकाची पणे खुडून ती ब्लांच करून घ्यावीत. म्हणजे उकळत्या पाण्यात पालकाची पानं घालून २ ते ४ मिनिटे ती उकळायची आणि लगेचच गार पाण्यात घालायची. असं केल्याने पालकाचा हिरवा रंग छान खुलून येतो आणि पालक थोडा शिजतोही. गार पाण्यातून पानं काढली की त्यातलं शक्य तेवढं पाणी काढून ती पानं चिरून घ्यावी. मटार उकडावेत व त्यातालेदेखील पाणी काढून ते ठेचून घ्यावेत. मग उकडलेला बटाटा हाताने छान कुस्करून घ्यावा. त्यात पालक, मटार, बारीक चिरलेली मिरची, किसलेला आलं, कॉर्नफ्लोर, चाट मसाला व मीठ घालावं. छान गोळा मळून घ्यावा. पाहिजे त्या आकाराचे कबाब करून ते तळून घावेत. कबाब तेलात पसरायला लागले तर त्यात थोडं कॉर्नफ्लोर घालून परत गोळा मळून घ्यावा. यासाठी पहिले एक छोटा गोळा तेलात टाकून तो फुटत नाही ना ते पाहावे व मगच बाकीचे कबाब करायला घ्यावेत. तुम्ही हे कबाब shallow fry पण करू शकता. हे कबाब बनवताना मध्ये पनीरचा तुकडा, काजू किंवा मनुका घालून शाही हरा भरा कबाब देखील बनवता येईल.

वाढणी :- २ ते ३ माणसे

कोथिंबीर वडी

साहित्य :-

१. बारीक चिरलेली कोथिंबीर २ वाट्या

२. २ चमचे डाळीचं पीठ

३. २ चमचे तांदुळाच पीठ

४. ४ ते ५ चमचे थालीपीठाची भाजाणी

५. अर्धा चमचा तिखट

६. धणे जिरे पूड प्रत्येकी अर्धा चमचा

७. चवीनुसार मीठ

कृती :-

प्रथम कोथिंबीर धुवून चिरून घ्यावी. त्यात डाळीचं पीठ, तांदुळाच पीठ, तिखट, भाजाणी, धणे जिरे पूड व चवीनुसार मीठ घालावे. पाणी न घालता या मिश्रणाचा गोळा होतोय का ते पहावं. गरज पडल्यास १ - १ चमचा पाणी घालत जावं. छान गोळा तयार झाला की कुकरमध्ये २ शिट्ट्या काढून उकडून घ्यावा. गोळा थोडासा गार झाला की त्याचे तुकडे करून थोड्या तेलामध्ये तळून घ्यावेत. कुरकुरीत गरम गरम कोथिंबीर वडी जेवताना तोंडीलावणं म्हणून किंवा चहाबरोबर serve कराव्यात.

वाढणी :- २ ते ३ माणसे

वॉर्म सलाड

साहित्य :-

१. उभा चिरलेला कोबी २ वाट्या

२. उभं चिरलेला गाजर अर्धी वाटी

३. उभी चिरलेली सिमला मिरची अर्धी वाटी

४. उभा चिरलेला कांदा अर्धी वाटी

५. स्वीट कॉर्नचे दाणे पाव वाटी

६. तिरका चिरलेला श्रावण घेवडा अर्धी वाटी

७. २ ते ३ चमचे ऑलिव ऑइल

८. काळी मिरी पावडर

९. चवीनुसार मीठ

१०. इटालियन सिझानिंग अर्धा चमचा

११. रेड चिली फ्लेक्स चवीनुसार

१२. १ चमचा लिंबाचा रस

कृती :-

एका पॅनमध्ये ऑलिव ऑइल गरम करून घ्यावे. त्यात प्रथम कांदा थोडासा परतावा. मग त्यात काळ्या मिरीची पावडर व रेड चिली फ्लेक्स घालावेत. सर्व भाज्या घाल्याव्यात व छान परताव्यात. या भाज्या थोड्या मऊ झाल्या की त्यात इटालियन सिझानिंग व मीठ घालावे. पुन्हा थोडावेळ परतावे. या भाज्या आपल्याला पूर्णपणे शिजवायच्या नाहीयेत. भाज्या अर्ध्या कच्च्या असतानाच लिंबू पिळावे व हे सलाड एका बाउल मध्ये घेऊन छान गरम गरम serve करावे.

या सलाड मध्ये तुम्ही बेबी कॉर्न, वेगवेगळ्या रंगाच्या सिमला मिरचीही वापरू शकता. हे सलाड थंडीच्या दिवसात गरम गरम खायला अतिशय छान वाटते.

वाढणी :- ३ ते ४ माणसे

वरणफळं / चकोल्या

साहित्य :-

१. २ कप पोळीची कणिक

२. १ चमचा हळद

३. २ चमचे तिखट

४. धना जीरा पूड प्रत्येकी २ चमचे

५. गरम मसाला ३ चमचे

६. तेल ४ ते ५ चमचे

७. १ कप चिरलेली कोथिंबीर

८. तूर डाळ १ कप

९. चवीनुसार मीठ

१०. ६ ते ७ कढीपत्त्याची पणे

११. २ ते ३ आमसुले / कोकम

कृती :-

प्रथम तूर डाळ दीड कप पाणी घालून कुकर मध्ये उकडून घ्यावी. पोळीची कणिक घेऊन त्यात अर्धा चमचा हळद, १ चमचा तिखट, धना जीरा पूड प्रत्येकी १ चमचा, दीड चमचा गरम मसाला, चवीप्रमाणे मीठ, थोडं तेल व कोथिंबीर घालावी. पोळीच्या कणिकेपेक्षा थोडीशी घट्ट कणिक मळावी. आता कढईमध्ये तेलाची फोडणी करून त्यात मोहरी व कढीपत्ता घालावा व उरलेले सर्व मसाले घालावेत. उकडलेली डाळ थोडी मॅश करून कढईत घालावी. कोथिंबीर व चवीनुसार मीठ घालावे. आमटी थोडी पातळ होण्यासाठी थोडं पाणी घालावं. आमसुले घालून आमटीला उकळी येऊ द्यावी व आमटी बारीक आचेवर उकळत ठेवावी. आता मळलेल्या कणिकेचे छोटे गोळे घेऊन त्यांना तेल लावून ते लाटावेत. पोळी लाटली की कातण्याने शंकरपाळीच्या आकाराचे तुकडे करावेत व आमटीमध्ये सोडावेत. आमटी थोडी उकळावी व तोवर दुसरी पोळी लाटून घ्यावी. आमटीमध्ये अशाप्रकारे पोळीचे तुकडे घातले की आमटी मध्यम आचेवर थोडावेळ उकळावी. म्हणजे कच्ची कणिक शिजेल. आमटी पातळ राहील इतपत तुकडे घालावेत. मध्ये मध्ये आमटी उकळत असताना ढवळावी. अशी तयार वरणफळे एका बाउलमध्ये घालून वरून कोथिंबीर घालून गरम गरम serve करावे. अतिशय झटपट होणारे हे पूर्ण जेवण आहे. वरणफळे वाढताना तूप आणि लिंबू त्यावर घालावे व मगच वाढावे.

वाढणी :- २ ते ३ माणसे

राज कचोरी

साहित्य :-

१. मैदा १ कप

२. १ ते ३ चमचे तेल

३. चवीनुसार मीठ

४. साधारणपणे १/४ कप कोमट पाणी

५. १/३ कप बेसन

६. चिली फ्लेक्स अर्धा चमचा

७. आमचूर पावडर १ चमचा

८. मोड आलेले मुग २ वाट्या

९. २ उकडलेले बटाटे

१०. पुदिना, आलं, लसूण, हिरवी मिरची, मीठ आणि कोथिंबीर यांची चटणी

११. चिंचेची गोड चटणी (ही चटणी ब्लॉगवर लिहिलेली आहे.)

१२. १ कप फेटलेलं दही

१३. कोथिंबीर, शेव सजावटीकरता

१४. तळणीसाठी तेल

कृती:-

प्रथम मैदा, १ चमचा तेल चवीनुसार मीठ व कोमट पाणी हे सर्व जिन्नस एकत्र करून अगदी मऊसर कणिक मलीन घ्यावी. मैद्याची कणिक भिजवताना नेहेमी जास्त वेळ कणिक मळावी. १० ते १५ मिनिटं कणिक झाकून ठेवावी. आता बेसन, १ चमचा तेल, चवीनुसार मीठ, चिली फ्लेक्स व आमचूर पावडर हे सर्व जिन्नस हाताने एकत्र करून घेऊन सारण करून घ्यावे. मोड आलेले मुग एका कढईमध्ये २ ते ४ चमचे पाणी घालून व चवीपुरतं मीठ घालून थोडे मऊसर होईपर्यंत शिजवून घ्यावेत. उकडलेला बटाटा चौकोनी चिरून घ्यावा. मैद्याची जी कणिक आपण माळली होती ती घेऊन त्याचे छोटे छोटे गोळे करून घ्यावेत. हे गोळे तळहाताएवढे लाटून घ्यावे. या लाटलेल्या कणकेमध्ये बेसनाचे सारण जे आपण तयार केलं होतं ते चमचाभर भरून घ्यावं. सारण भरून कणकेचे गोळे करून ते थोडावेळ बाजूला ठेवावेत. एक ५ ते १० मिनिटांनी हे बेसनाचे पीठ भरलेले गोळे घेऊन पुन्हा तळहाताएवढे लाटून घ्यावेत. लाटताना ज्या बाजूने हे गोळे बंद केले आहेत ती बाजू वरती घेऊन लाटावेत. त्यामुळे कचोरी छान फुलून येते. कढईमध्ये तेल तापवावे. पण तेल जास्त कढत असू नये. कचोरी तेलात टाकली की ती लगेच वर येत कामा नये. ती आपोआपच फुगते व वर येते. तेलात कचोरी तळताना ती सतत हलवू नये किंवा तेलात खाली दाबू नये. मध्यम आचेवर कचोरी दोन्ही बाजूने ब्राऊन होईपर्यंत तळावी. अशी तळलेली कचोरी जास्त कुरकुरीत होते. कचोरी तयार झाल्यावर ती गार झाली की मग त्याला पाणीपुरीच्या पुरीप्रमाणे मध्ये भोक पाडावे. आता या कचोरीमध्ये उकलेल्या बटाट्याच्या फोडी, शिजवलेले मोड आलेले मुग, पुदिन्याची हिरवी चटणी, चिंचेची गोड चटणी, फेटलेलं दही, कोथिंबीर व बारीक शेव घालून छान सजवून serve करावी.

वाढणी :- वरील साहित्यात १० ते १२ कचोरी होतील.