गाजर हलवा

साहित्य :-

१. ४ ते ५ वाट्या किसलेलं गाजर

२. १ ते २ वाट्या साखर

३. अर्धी वाटी खवा

४. ४ ते ५ चमचे तूप

५. काजू, बेदाणे पाव वाटी

कृती :-

एका नॉनस्टिक कढईमध्ये तूप गरम करून घ्यावे. या तूपात प्रथम काजू व बेदाणे टाळावेत. काजूचा रंग बदलला आणि बेदाणे फुलले की लगेच किसलेलं गाजर घालून सर्व जिन्नस छान एकत्रित करावेत. गाजरावर झाकण ठेवून मध्यम आचेवर गाजर मऊ शिजू द्यावे. गाजर खाली लागणार नाही याची काळजी घ्यावी. मधून मधून झाकण काढून ढवळावे. गाजर शिजत आले की त्याचा रंग बदलतो आणि गाजर जवळपास मापामध्ये अर्धं होतं. गाजर छान शिजला की त्यात साखर घालावी. साखर घातल्यावर थोडं पाणी सुटतं. ते पाणी आटेपर्यंत गाजर शिजवावं. खवा थोडसं गरम करून घ्यावा व शिजलेल्या गाजरामध्ये घालावं. ५ मिनिट सर्व मिश्रण शिजवावे. गरम गरम गाजर हलवा छान सजवून serve करावा.

वाढणी :- २ ते ३ माणसे

फ्लॉवर मंचुरियन

साहित्य :-

१. फ्लॉवरची फुलं २ कप

२. बारीक चिरलेला कांदा

३. टोमॅटो केचअप ४ चमचे

४. चिली सॉस अर्धा चमचा

५. सोय सॉस २ ते ३ चमचे

६. मैदा पाव कप

७. काळी मिरी पावडर १ चमचा

८. कांद्याची पात अर्धा कप

९. तळणीसाठी तेल

१०. चवीनुसार मीठ

११. २ चमचे लसूण पाकळ्या चिरलेल्या

१२. कॉर्नफ्लॉवर १ चमचा

कृती :-

प्रथम एका पातेल्यामध्ये मैदा घेऊन त्यात मिरी पावडर, चवीनुसार मीठ व पाणी घालावे. गुठळ्या होणार नाहीत अशी काळजी घेऊन भज्याच्या पीठाइतपत पातळ पीठ भिजवावे. फ्लॉवरची फुलं या पिठामध्ये घोळवून तेलात गोल्डन होईपर्यंत तळून घ्यावे. ही फुलं बाजूला पेपर टॉवेलवर काढावीत. एका कढईमध्ये तेल घेऊन त्यात लसूण घालावं. मिनिटभर परतावे. त्यात कांदा घालून तो मऊ झाला की मग टोमॅटो केचअप, चिली सॉस व सोय सॉस घालावं. थोडसं परतावं. कॉर्नफ्लॉवर पाण्यात घोळवून या सॉसमध्ये घालावे. फावा असल्यास थोडं पाणी घालावं. फ्लॉवरची तळलेली फुलं घालावीत.छान मिक्स करावे. जर जास्त तिखट हवं असेल तर कांदा घातला की हिरव्या मिरचीचे तुकडे घालावेत. कांद्याची पात घालून भाजी serve करावी.

वाढणी :- २ ते ३ माणसे

व्हेज कोल्हापुरी

साहित्य :-

१. सुकं खोबरं ६ मोठे चमचे

२. पांढरे तीळ ३ चमचे

३. ४ ते ५ लवंगा

४. ४ ते ५ मिरी

५. छोटा दालचिनीचा तुकडा

६. ७ ते ८ काजू

७. १/२ कप बारीक चिरलेला कांदा

८. १/२ कप बारीक चिरलेला टोमॅटो

९. १ कप चिरलेला बटाटा

१०. १/२ कप चिरलेलं गाजर

११. १/२ कप चिरलेलं फ्लॉवर

१२. पाव कप बारीक चिरलेली सिमला मिरची

१३. १/२ कप चिरलेला पनीर

१४. १/२ कप मटार

१५. १ चमचा तिखट

१६. धणे जिरे पूड प्रत्येकी १ चमचा

१७. १ चमचा गरम मसाला

१८. फोडणीसाठी तेल व जीरं

१९. आलं लसूण पेस्ट प्रत्येकी १ चमचा

२०. चवीनुसार मीठ

२१. ३ चमचे बटर.

कृती :-

प्रथम एका पॅन मध्ये सुकं खोबरं, तीळ, लवंगा, मिरी व दालचिनी हा मसाला कोरडाच brown होईपर्यंत भाजून घ्यावा. हा मसाला गार झाला की काजू घालून मिक्सरमधून वाटून घ्यावा. वाटताना थोडं पाणी घालत घालत छान मऊ पेस्ट करून घ्यावी. सगळ्या भाज्या व पनीर चौकोनी चिरून घ्यावे. एका कढईमध्ये तेल गरम करावं व त्यात जीरं घालावं. जीरं तडतडल की त्यात कांदा घालावं. कांदा छान brown करून घ्यावा. मग त्यात आलं लसूण पेस्ट घालून मिनिटभर परतावं. आलं लसणाचा कच्चा वास गेला की त्यात टोमॅटो घालवा. टोमॅटो छान मऊ होईपर्यंत परतावं. मग त्यात धणे जिरे पूड घालावी. थोडावेळ परतून मग त्यात वरील मिक्सरमध्ये वाटलेली पेस्ट घालावी. तिखट घालावं. रंगासाठी पॅप्रिका घालावं. अगदी तेल सुटेपर्यंत छान परतावं. आता हळू हळू एक एक भाज्या घालाव्यात. प्रथम बटाटा घालवा व थोडं पाणी घालून झाकण लावून बटाटा ५ मिनिटं शिजवावा. मग गाजर, फ्लॉवर, सिमला मिरची व मटार घालून परत थोडं पाणी घालावं. चवीनुसार मीठ व गरम मसाला घालून झाकण लावून भाजी शिजू द्यावी. १० मिनिटांनी झाकण काढून भाजी छान ढवळावी व त्यात पनीर घालावे. छान मिक्स करावी. ग्रेव्ही जशी हवी असेल त्यानुसार भाजीमध्ये पाणी घालावे. सर्व भाज्या छान मऊ शिजल्या की थोडे बटर घालावे. ते विरघळल्यावर छान कोथिंबीर घालून भाजी गरम गरम serve करावी.

वाढणी :- ३ ते ४ माणसे.

मसाला दूध

साहित्य :-

१. ३ कप दूध

२. अर्धा कप साखर

३. कापलेले पिस्ते, बदाम प्रत्येकी अर्धा चमचा

४. अर्धा चमचा चारोळी

५. केशर व वेलची पूड चिमूटभर

कृती :-

प्रथम एका पातेल्यामध्ये दूध आटवत ठेवावे. ३ कप दुधाचे साधारण २ कप दूध झाले की त्यात साखर घालून थोडावेळ परत उकळावे. वेलची पूड, बदाम, पिस्ते, चारोळी व केशर घालून आच बंद करावी. कोजागिरी पोर्णिमेला असे मसाला दूध पिण्याची पद्धत आहे.

वाढणी :- ३ ते ४ माणसे.

दालफ्राय

साहित्य :-

१. अर्धा कप बारीक चिरलेला कांदा

२. पाव कप बारीक चिरलेला टोमॅटो

३. २ सुक्या लाल मिरच्या

४. ७ ते ८ कढीपत्त्याची पानं

५. किसलेलं आलं लसूण प्रत्येकी अर्धा चमचा

६. फोडणीसाठी तेल आणि जीरं

७. पाव चमचा हळद

८. १ कप मुगाची डाळ किंवा तुरीची डाळ

९. चवीपुरतं मीठ

कृती :-

एका कुकरमध्ये तेल तापवून घ्यावं. त्यात जीरं, कढीपत्ता व लाल मिरच्या घालून फोडणी करावी. थोडी हळद घालून मग कांदा घालावा. किसलेलं आलं व लसूण घालून परतून घ्यावं. कांदा थोडा मऊसर झाला की त्यात टोमॅटो घालावा. टोमॅटो मऊ शिजला की त्यात मुगाची/तुरीची डाळ घालावी. डाळ न शिजवताच घालावी. थोडी परतून घ्यावी व डाळीच्या दीडपट पाणी घालावे. चवीनुसार मीठ घालावे. कुकरचे झाकण लावून ३ शिट्ट्या करून घ्याव्यात. कुकरच झाकण पडलं की एका बाउलमध्ये डाळ काढून कोथिंबीर घालून गरम गरम serve करावी. साधा भात, जीरा राइस सोबत ही दालफ्राय फार छान लागते.

वाढणी :- २ ते ३ माणसे.

उप्पीट

साहित्य :-

१. कप रवा

२. २ कप कोमट पाणी

३. २ हिरव्या मिरच्या

४. पाव कप बारीक चिरलेला कांदा

५. २ ते ३ चमचे दाणे

६. ७ ते ८ कढीपत्त्याची पानं

७. अर्धा चमचा आलं

८. कोथिंबीर, खोबरं व फरसाण

९. फोडणीच साहित्य

१०. १ चमचा उडदाची डाळ

११. चवीपुरतं मीठ

१२. १/२ चमचा लिंबाचा रस

कृती :-

प्रथम रवा मध्यम आचेवर थोडा भाजून घ्यावा. भाजलेला रवा एका ताटात काढून घ्यावा. कढईमध्ये थोडा तेल तापवून घ्यावं. त्यात मोहरी, मिरच्या मधोमध उभ्या चिरून, थोडा आलं किसून घालावं. कढीपत्ते घालावेत. थोडी उडदाची डाळ घालावी. ती तांबूस झाली की शेंगदाणे घालावेत. ते पण परतले गेले की कांदा घालावा. कांदा मऊ झाला की त्यात भाजलेला रवा घालावा. रवा थोडासा परत परतून घ्यावा. मग त्यात कोमट पाणी घालावं. लगेचच मीठ व लिंबाचा रस घालून छान ढवळाव व झाकण लाऊन उप्पीट शिजवून घ्यावं. जर तुम्हाला फडफडीत उप्पीट आवडत असेल तर कमी पाणी घालावं किंवा अगदी मऊसर उप्पीट आवडत असेल तर जास्त पाणी घालावं. छान गरम गरम उप्पीट खोबरं, कोथिंबीर व फरसाण घालून serve करावं.

आवडत असल्यास उडदाच्या डाळीबरोबर थोडे काजू घालून ते परतावेत.

वाढणी :- २ ते ३ माणसे

टोमॅटो राईस

साहित्य :-

१. २ कप शिजलेला भात

२. पाव कप बारीक चिरलेला कांदा

३. ३ ते ४ मध्यम आकाराचे टोमॅटो

४. २ सुक्या लाल मिरच्या

५. २ हिरव्या मिरच्या

६. ७ ते ८ कढीपत्त्याची पानं

७. २ चमचे उडदाची डाळ

८. १ चमचा हरभरा डाळ

९. ३ ते ४ चमचे शेंगदाणे

१०. जीरं व मोहरी

११. चवीनुसार मीठ

१२. थोडीशी हळद

कृती :-

प्रथम एका कढईमध्ये तेल तापवावे. तेल तापल्यावर त्यात मोहरी व जीरं घालावं. दोन्हीही तडतडले की मग त्यात कढीपत्ता व लाल मिरच्या घालाव्यात. नंतर हरभऱ्याची डाळ घालून छान परतून घ्यावी. उडदाची डाळ घालावी व शेंगदाणे घालावेत. सर्व गोष्टी छान परतल्या, डाळींचे रंग बदलले की त्यात चिरलेला कांदा घालावा. कांदा मऊ होईपर्यंत परतावे. मग हिरव्या मिरच्या चिरून घालाव्यात. मग त्यात बारीक चिरलेला टोमॅटो घालावा. थोडंसं मीठ घालावं. टोमॅटो छान मऊ होईपर्यंत शिजू द्यावे. थोडीशी हळद घालावी. मग यात शिजलेला मोकळा भात घालावा. चवीनुसार मीठ घालावे व सर्व जिन्नस छान एकजीव करावेत. कोथिंबीर घालून हा भात गरम गरम serve करावा.

टीप :- भात शिजवतानाच मीठ घातले तर एकजीव करणे अजूनच सोपे होईल.

वाढणी :- ३ ते ४ माणसे.

उपवासाची कचोरी

साहित्य :-

१. २ ते ३ माध्यम आकाराचे बटाटे

२. ४ मिरच्या

३. १ चमचा आलं

४. २ चमचे जीरं

५. १ कप किसलेलं खोबरं

६. चवीनुसार मीठ

७. अर्धा कप कोथिंबीर

८. २ ते ३ चमचे कोर्नफ्लोर

९. तळणीसाठी तेल

१०. चिमूटभर साखर

कृती:-

बटाटे उकडून सोलावेत व हाताने कुस्करून घ्यावेत. त्यात कोर्नफ्लोर घालावे. २ मिरच्या व थोडं आलं वाटून घ्यावं व बटाट्यामध्ये घालावं. मीठ घालून हे सर्व पदार्थ छान एकत्र करून गोळा बनवून घ्यावा. उरलेल्या मिरच्या, आलं व जिरे वाटून घेऊन किसलेल्या खोबऱ्यामध्ये घालावे. मीठ व थोडीशी साखर घालून सर्व एकत्र करावं. आता बटाट्याच्या गोळ्यामधला थोडा गोळा घेऊन त्याला मध्ये खळगा करावा व त्यात खोबऱ्याच सारण भराव आणि कचोरी बंद करावी. जर आवडत असेल तर सारण भरल्यावर त्यात एखादा बेदाणा घालावा. सर्व कचोऱ्या अशा तयार करून घ्याव्यात. तेल मध्यम आचेवर तापवून घ्यावं. कचोरी तेलात पूर्ण बुडेल एवढं तेल कढईमध्ये घ्यावं. एकदा तेलात कचोरी घातली की जास्त हलवू नये. झाऱ्यावर कचोरी ठेवून मग तेलात सोडावी म्हणजे तिचा आकार बदलणार नाही. कोर्नफ्लोरमुळे कचोरी तळली जायला थोडा जास्त वेळ लागेल. छान सोनेरी रंगावर सर्व कचोऱ्या तळून घ्याव्यात व गरम गरम serve कराव्यात.

वाढणी :- या साहित्यात साधारणपणे १० ते १२ कचोऱ्या होतील.

मुगाच्या डाळीचे डोसे

साहित्य :-

१. २ कप मुगाची डाळ

२. २ ते ३ मिरच्या

३. अर्धा चमचा आलं

४. अर्धा चमचा लसूण

५. अर्धा चमचा जीरं

६. कोथिंबीर

७. चवीनुसार मीठ

कृती :-

प्रथम मुगाची डाळ ७ ते ८ तास भिजवून ठेवावी. भिजलेली मुगाची डाळ आलं, लसूण, मिरची व मीठ हे सगळे जिन्नस मिक्सरमधून वाटावेत. थोडं पाणी घालून पीठ पळीवाढ होईल इतपत सैल करावं. तवा मध्यम आचेवर तापवून घ्यावा. डावाने तव्यावर डोसे घालावेत. आपण नेहमी जसे डोसे घालतो तेवढे पातळ घालू नयेत. थोडेसे जाडसरच घालावेत. एका बाजूने डोसा भाजला गेला की तो उलटून दुसऱ्या बाजूने पण भाजून घ्यावा. असा गरम गरम डोसा खोबऱ्याच्या चटणीसोबत किंवा केचअप सोबत serve करावेत.

वाढणी:- या साहित्यात साधारण १० ते १२ डोसे होतील.

फुलका

साहित्य :-

१. २ कप गव्हाची कणिक

२. ४ चमचे तेल

३. चवीपुरतं मीठ

४. कोमट पाणी

कृती:-

प्रथम कणकेमध्ये मीठ घालावे व कणिक थोडी मिक्स करून घ्यावी. त्यानंतर कणकेमध्ये २ चमचे तेल घालावे. तेलामुळे होणाऱ्या सगळ्या गुठळ्या मोडून घ्याव्यात. तेल व कणिक छान एकजीव करून घ्यावी. हळू हळू कोमट पाणी घालत घालत कणिक मळावी. फार घट्ट किंवा अगदी सैल कणिक मळू नये. कणिक मळल्यावर तो गोळा किमान अर्धा तास झाकून ठेवावा. आचेवर प्रथम जाळी ठेवून त्यावर तवा ठेवावा. तवा छान तापला की आच मध्यमहून थोडी जास्त ठेवावी. कणकेच्या गोळ्याचे ८ ते १० समान आकाराचे गोळे करून एक गोळा थोडासा पीठ लावून छान गोल लाटून घ्यावा. हा लाटलेला फुलका तव्यावर टाकला की अगदी थोडासाच भाजून लगेचच त्याची बाजू बदलावी. बाजू बदल्यावर मात्र फुलका छान भाजून घ्यावा. आता जी बाजू भाजलेली नाही ती तवा उचलून जाळीवर टाकावी. फुलका छान फुगला की चिमट्याने लगेच उचलावा. परत तवा जाळीवर ठेवून पुढचे फुलके बनवावेत.

वाढणी :- या साहित्याचे किमान ८ ते १० फुलके होतील.

गणपती बाप्पा मोरया!!

गणपती बाप्पा मोरया!!

उकडीचे मोदक

साहित्य :-

१. १ वाटी पाणी

२. १ वाटी तांदुळाची पिठी

३. १ चमचा बटर किंवा तूप

४. चिमूटभर मीठ

५. ३ ते ४ चमचे तेल

६. अर्धी वाटी कोमट पाणी

७. १ वाटी ओलं खोबरं

८. १ वाटीपेक्षा थोडा कमी गूळ

९. १ चमचा वेलची पूड

१०. ड्रायफ्रुट्स (हवी असल्यास )

११. दीड चमचा खसखस

कृती :-

उकड :-

प्रथम १ वाटी पाणी उकळत ठेवावे. पाण्याला उकळी आली की लगेचच त्यात मीठ व तूप घालावे. १ वाटी तांदळाची पिठी पहिले चाळून ठेवावी व पाण्याला उकळी आल्याआल्या लगेचच सर्व पिठी त्या पाण्यात घालावी. आच अगदी मंद करावी. पटापट पिठी पाण्यात एकत्र करावी. आच बंद करून झाकण लावून ही पिठी ठेवून द्यावी. ही अशीच कृती मायक्रोवेव्ह मधेही तुम्ही करू शकता. पहिले पाणी तूप व मीठ घालून १ मिनिटासाठी गरम करावे. चाळलेली पिठी घालून पुन्हा २ मिनिटे ठेवावे. उकड तयार.

सारण :-

आता सारण करून घ्यावे. हे देखील मायक्रोवेव्हमध्ये छान होते. एका मायक्रोवेव्हच्या भांड्यात प्रथम खसखस ४० ते ५० सेकंद भाजून घ्यावी. त्यात ओलं खोबरं व गूळ घालावं. पुन्हा ४० सेकंद ठेवावा. गूळ व खोबरं छान एकत्र करावं व हे सारण मायक्रोवेव्हमध्ये २ मिनिटे ठेवावं. जर सारणातल पाणी आटलं नसेल तर काही सेकंद पुन्हा मायक्रोवेव्हमध्ये ठेवावं. सारण तयार झाल्यावर वेलची पूड व ड्रायफ्रुट्स घालावीत. मिक्स करावं. हे सारण तुम्ही आचेवर शिजवत असाल तर आच मध्यम असावी. आणि सारणाच पाणी आटल्या आटल्या सारण भांड्यामधून काढावे.

मोदक :-

आता उकड व सारण या दोन्ही गोष्टी तयार झाल्या. आता मगाशी जी उकड बनवली आहे टी कोमट पाणी लावून छान मळून घ्यावी. त्याचे छोटे छोटे गोळे बनवावेत. चीर नसेल अशाप्रकारे एक एक गोळा तयार करावा. मधोमध अंगठ्याने दाबून खळगा तयार करावा. बाकीच्या बोटांनी या गोळ्याला बाहेरून आधार देत अंगठ्याने आटल्या बाजूला हलकासा जोर लावून वाटीसारखा आकार तयार करावा. त्याला छान काळ्या पाडाव्यात. मध्ये सारण भरावे व हळुवार पणे कळ्या दुमडणार नाहीत अशी काळजी घेऊन मोदक बंद करावा.

हाताने मोदक बनवणे ही एक कला आहे. जर हाताने मोदक बनवायला अवघड वाटत असतील आणि मोदकाचा साचा उपलब्ध असेल तर साच्याचा वापर करूनच मोदक बनवावेत. त्यासाठी साच्याला थोडेसे पाणी व तेल लावून घ्यावे. साचा बंद करून उकडीचा छोटा गोळा साच्यात भरावा. साच्यात सर्व बाजूनी तो गोळा पसरवून घ्यावा. सारण भरावे व एक चकती खालच्या बाजूने लावून हळू हळू साचा उघडावा.

हे तयार होणारे मोदक ओलसर कापडाखाली ठेवावेत म्हणजे उकड बाहेरून कोरडी पडणार नाही व मोदक फुटणार नाहीत.

अशाप्रकारे मोदक तयार झाले की इडली पात्रात १० मिनिटे उकडून घ्यावेत. तुमच्याकडे राइस कुकर असेल तर त्यातही जाळीच्या ताटलीवर मोदक छान उकडले जातात. असे गरम गरम मोदक साजूक तूप घालून serve करावेत.

वाढणी :- वरील साहित्यात साधारण ५ ते ६ मध्यम आकाराचे मोदक तयार होतील.

गोडाचे

पेढा

साहित्य :-

१. ४ कप दूध

२. १/४ कप लिंबाचा रस

३. १/३ कप मिल्क पावडर

४. १/३ कप दूध

५. १/२ कप साखर

६. १ चमचा वेलची पूड

७. चिमूटभर केशर

८. ३ ते ४ चमचे बटर

कृती :-

प्रथम ४ कप दुधाचे पनीर बनवून घ्यावे. मग नॉनस्टिक कढईमध्ये प्रथम बटर वितळून घ्यावे. सतत ढवळावं म्हणजे बटर करपणार नाही. बटर वितळल्यावर पहिले दूध घालावं. लगेचच मिल्क पावडर व पनीर घालावं आणि सतत ढवळत राहावं. हे मिश्रण कढईला खाली लागणार नाही याची पूर्ण काळजी घ्यावी. मध्यम आचेवर हे मिश्रण साधारण १० ते १२ मिनिटे आटवल्यावर त्याचा गोळा तयार होईल. केशर घालून थोडावेळ परत ढवळावे. हे मिश्रण ढवळताना डावाने सतत दाबत राहावे जेणेकरून अतिशय मऊ खवा तयार होईल. खवा तयार झाला की तो एका बाउलमध्ये काढून घ्यावा. थोडा गार झाला की मग तयार साखर व वेलची पूड घालून थोडा मळून घ्यावा. या मळलेल्या गोळ्याचे तुम्हाला हव्या त्या आकाराचे पेढे बनवावेत.

वाढणी :- या साहित्यात साधारण १२ ते १५ पेढे होतील.

मलई बर्फी

साहित्य :-

१. ४ कप दूध

२.  पाव  कप साखर

३. अर्धा चमचा वेलची पूड

४. पिस्ते व बदाम सजावटीसाठी

कृती:-

२ कप दुधाचे प्रथम पनीर बनवून घ्यावे.(पनीरची कृती blog वर नक्की पहावी.) मलई बर्फी साठीचं पनीर ताजंच बनवावं. पनीर कापडामध्ये गाळल्यावर फ्रीजमध्ये ठेवू नये. उरलेलं २ कप दूध आटवत ठेवावं. साधारण २ कप दुधाचं १ कप दूध होईपर्यंत आटवावं. दूध आटलं की त्यात हे ताजं पनीर घालावं. सतत ढवळावं. दूध आटून छान मिळून येईपर्यंत शिजवावं. त्याचा छान गोळा तयार होतो .गोळा बनत आला की त्यात साखर घालावी. साखर घातल्यावर मिळून आलेला गोळा थोडा परत पातळ होतो. त्यात वेलची पूड घालावी व आवडत असेल तर केशरही घालावे. केशर घातल्यावर बर्फीचा रंग अगदी पांढरा राहणार नाही. त्यानंतर २ ते ३ मिनिटे शिजवून घ्यावं व तो गोळा एका तूप लावलेल्या ताटलीवर थोडा जाडसर पसरावा. त्यावर चांदीचा वर्ख लावून पिस्ते व बदामाचे कप लावून सजवावे व तुम्हाला हव्या त्या आकाराच्या वड्या पाडाव्यात. मलई बर्फी तयार.

वाढणी:- या साहित्याच्या साधारण १० ते १२ बर्फी बनतील.

पनीर

साहित्य :-

१. ४ कप दूध

२. १/४ कप लिंबाचा रस

३. अर्धा कप पाणी

कृती :-

जाड बुडाच्या पातेल्यामध्ये दूध उकळत ठेवावे. दूध पातेल्याला खाली चिकटणार नाही याची सतत काळजी घ्यावी. आच मध्यम असू द्यावी. दुधाला उकळी आली की आच मंद करावी. लिंबू रस पाण्यामध्ये एकत्रित करून हळूहळू उकळी आलेल्या दूधात घालावे. दूध सतत ढवळावे. थोडेसे ढवळल्यावर पनीर व पाणी वेगवेगळे होताना दिसू लागेल. आच बंद करावी. थोडासा वेळ दूध ढवळावे. एका चाळणीत एक पातळ कापड घालून हे पनीर गाळून घ्यावे. (गाळून शिल्लक राहिलेले पाणी पोळीची कणिक मळायला वापरले जाऊ शकते.) या गाळलेल्या पनीर वर गार पाणी सोडावे. गार पाणी सोडल्याने पनीर घट्ट होत नाही. कापदातले पनीर घट्ट पिळून घ्यावे. कापडासकट एका परातीत ठेवून त्यावर वजनदार असे काहीही ठेवावे. म्हणजे पनीर मधील उरले सुरले पाणी देखील निघून जाईल. ५ ते १० मिनिटांनी या पनीरचे तुम्हाला हवे तसे तुकडे करावेत.

फ्लॉवर बटाटा रस्सा

साहित्य :-

१. मध्यम आकाराचे २ बटाटे

२. फ्लॉवरची मध्यम आकाराची ८ ते १० फुले

३. अर्धी वाटी कांदा बारीक चिरलेला

४. छोटा टोमॅटो बारीक चिरलेला

५. पाव चमचा हळद

६. १ चमचा तिखट

७. १ चमचा प्रत्येकी धना जीरं पूड

८. १ चमचा गोडा मसाला

९. ५ ते ६ कढीपत्ते

१०. चवीपुरते मीठ

कृती:-

प्रथम एका कढईमध्ये तेल तापवावे व त्यात मोहरी व जीरं घालून फोडणी करावी. जीरं मोहरी तडतडले की त्यात कढीपत्ते घालावेत. हळद घालून थोडंसं परतावं व बारीक चिरलेला कांदा घालावं. कांदा मऊ होईपर्यंत परतावा व त्यात बटाट्याच्या मध्यम आकाराच्या फोडी करून घालाव्यात. बटाटा तेलावरच थोडासा शिजवावा. मग अर्ध्या शिजलेल्या बटाट्यामध्ये तिखट, धणे जीरं पूड, मसाला घालावा. फ्लॉवरचे मध्यम आकाराचे तुकडे घालावेत व अगदी कमी पाणी घालून रस्सा शिजवत ठेवावा. रस्सा पूर्ण शिजवून मग त्यात जितकं हवं आहे तितकं पाणी व चवीपुरतं मीठ घालून रस्सा २ ते ३ मिनिटे शिजू द्यावा. कोथिंबीर पेरून हा रस्सा पोळी किंवा भातासोबत serve करावा.

वाढणी :- २ ते ३ माणसे

नारळी भात

साहित्य :-

१. बासमती तांदूळ १ कप

२. २ चमचे तूप

३. ४ ते ५ लवंगा

४. २ ते २ १/२ कप पाणी

५. किसलेला गूळ १ कप

६. पाव चमचा वेलची पूड

७. अर्धा कप खवलेला नारळ

कृती :-

प्रथम तांदूळ धुऊन १५ मिनिटं भिजवून ठेवावेत. एका कढईमध्ये २ चमचे तूप घ्यावे. तूप तापले की त्यात लवंगा घालाव्यात. तुपामध्ये लवंगा फुगल्या की त्यात भिजवलेले तांदूळ घालावेत व २ ते ३ मिनिटे परतावेत. तांदूळ परतला गेला की त्यात प्रथम २ कप पाणी घालून झाकण लावावे व भात छान शिजू द्यावा. आवश्यक वाटल्यास पुन्हा थोडे पाणी घालावे. भात मऊ शिजला की त्यात किसलेला गूळ घालावा. गूळ घातल्यावर भात परत थोडा पातळ होईल. तो पातळपणा पूर्ण आटला की मग त्यात नारळ घालून ५ मिनिटं शिजू द्यावा. या भाताच्या मुदी करून गरम गरम serve कराव्यात.

वाढणी :- २ ते ३ माणसे

बीट रूट मंचुरियन

साहित्य :-

१. १ बीट किसून

२. १ गाजर किसून

३. अर्धी वाटी फ्लॉवर बारीक चिरलेला

४. अर्धी वाटी श्रावण घेवडा बारीक चिरलेला

५. २ वाट्या उभा चिरलेला कोबी

६. पाव वाटी उभी चिरलेली सिमला मिरची

७. अर्धी वाटी उभा चिरलेला कांदा

८. २ ते ३ चमचे मैदा

९. ४ चमचे कोर्नफ्लोवर किंवा तांदुळाची पिठी

१०. ४ ते ५ चमचे सोय सॉस

११. ३ ते ४ चमचे टोमॅटो केचप

१२. अर्धा चमचा चिली सॉस

१३. तळणीसाठी तेल

कृती :-

प्रथम किसलेले गाजर, बीट,बारीक चिरलेला श्रावण घेवडा, फ्लॉवर, मैदा व तांदुळाची पिठी सर्व गोष्टी एकत्र कराव्यात. एका कढईमध्ये तेल तापवावे व या मिश्रणाचे गोळे करून ते तेलावर छान तळून घ्यावेत. प्रथम एक गोळा करून तळून बघावा. तो जर तेलात फुटला नाही तर इतर गोळे करून घ्यावेत. जर तो तेलात फुटला तर थोडी तांदुळाची पिठी वाढवावी. हे गोळे तयार झाले की ते एका kitchen towel वर काढून घ्यावेत. म्हणजे त्यातल जास्तीच तेल निघून जाईल. कढईमध्ये अगदी कमी तेल घेऊन ते गरम झाले की पहिले कांदा घालावा. मग कोबी, सिमला मिरची व कांद्याची पात घालावी. ह्या भाज्या थोड्या मऊ झाल्या की त्यात बीटाचे गोळे अर्थात मंचुरियन घालावेत. अगदी अलगत ते सर्व एकत्र करावं. त्यात सोय सॉस, केचअप व चिली सॉस घालून छान एकत्र करावं. पुन्हा १ चमचा कोर्नफ्लोवर घेऊन ते पाण्यात विरघळवून घ्यावा व भाजीमध्ये घालाव त्याने ही भाजी छान मिळून येईल. एक २ मिनिटे ही भाजी परतून मग एका bowl मध्ये काढावी व कांद्याची पात भुरभुरून भाजी गरम गरम serve करावी.

वाढणी :- ३ ते ४ माणसे

मशरूम पनीर कबाब

साहित्य :-

१. १० ते १२ मशरूम

२. १० ते १२ पनीरचे चौकोनी तुकडे

३. १ सिमला मिरची

४. १ टोमॅटो

५. १ कांदा

६. १ चमचा आलं

७. ४ ते ५ लसूण पाकळ्या

८. ३ ते ४ मिरच्या

९. १ चमचा जीरं पूड

१०. १ चमचा गरम मसाला

११. १ चमचा चाट मसाला

१२. १ चमचा मध

१३. १ चमचा लिंबू रस

१४. चवीनुसार मीठ

१५. ३ ते ४ स्क्युअर्स

कृती :-

कांदा, सिमला मिरची, टोमॅटो या सर्वांचे चौकोनी तुकडे करून घ्यावेत. मशरूम जर अख्खा वापरायचा असेल तर त्याचा केवळ देठ काढून टाकावा. नाहीतर त्याचेही चौकोनी तुकडे करावेत. आलं लसूण आणि मिरची वाटून त्याची पेस्ट बनवावी. त्यामध्ये जीरं पूड, गरम मसाला, चाट मसाला, मध, लिंबू रस, व मीठ घालून चिरलेल्या सर्व भाज्या त्यात घालाव्यात. छान मिक्स करून ३० मिनिटे ठेवावे. लाकडाचे स्क्युअर्स १५ मिनिटे पाण्यात भिजवावेत. म्हणजे तव्यावर वा ओवन मध्ये ते जळणार नाहीत. या स्क्युअर्सना एकामागे एक भाज्या लावून तव्यावर वा कोळशाच्या आचेवर खरपूस भाजाव्यात. छान चटपटीत कबाब तयार.

वाढणी :- २ ते ३ माणसे.

इडली

इडलीसाठी साहित्य :-

१. २ कप इडलीचा तांदूळ किंवा इडली रवा

२. १ कप उडदाची डाळ

३. अर्धा कप जाड पोहे

कृती :-

इडलीचा तांदूळ किंवा रवा आणि उडदाची डाळ वेगवेगळ्या पातेल्यांमध्ये भिजवावी. साधारण ७ ते ८ तास या दोन्ही गोष्टी भिजणं गरजेचं आहे. तांदूळ व डाळ भिजवताना पाणी थोडं जास्तच ठेवावं. ८ तासांनंतर अर्धा कप जाड पोहे घेवून ते पाण्यात भिजवावेत. जाड पोह्यामुळे इडली हलकी व्हायला मदत होते. १० ते १५ मिनिटांनी सर्व जिन्नस मिक्सरमधून वाटावेत. मिक्सरमधून वाटताना तांदूळ व डाळ यातील पाणी वेगळं काढावं व अगदी वाटताना लागेल तेवढंच पाणी घालावं. मिक्सरमधून काढलेलं पीठ एका मोठ्या पातेल्यात ठेवावं. नीट ढवळून घ्यावं. पातेल्यामध्ये पीठ फुगायला थोडी जागा असेल एवढं मोठं पातेलं घ्यावं. हे पीठ थोडं दाट असावं. मिक्सरमधून पीठ काढून एकत्रं केलं की त्यात मीठ घालावं व पीठ फर्मेंट होण्यासाठी ठेवावं. उन्हाळ्याच्या दिवसात सकाळी फर्मेंट करायला ठेवलेलं पीठ ७ ते ८ तासात तयार होतं. इडलीच पीठ सर्वसाधारणपणे दुप्पट होतं. पण थंडीच्या दिवसात मात्र पीठ फर्मेंट व्हायला १२ ते १५ तास लागू शकतात. पीठ फर्मेंट झालं की लगेचच इडली करायला घ्यावी. पीठ जास्त ढवळू नये. इडली करण्यासाठी इडली पात्रात किंवा कुकरमध्ये एक पेर बुडेल एवढं पाणी घ्यावं व इडलीच्या साच्याला थोडं तेल लावून तो साचा भरेल एवढं पीठ त्यात घालावं. सर्व साच्यात पीठ भरलं की ते इडली पात्रात ठेवावे व १० मिनिटे उकडावे. जर कुकरमध्ये साचा ठेवत असाल तर कुकरची शिट्टी आठवणीने काढून ठेवावी. चमच्याने किंवा सुरीने इडल्या उचलून घ्याव्यात.

सांबार व चटणी सोबत गरम गरम इडली serve करावी.

वाढणी :- ३ ते ४ माणसे.

पाणी पुरी

पुरीसाठीचे साहित्य :-

१. ३/४ कप रवा

२. १/४ कप मैदा

३. जवळपास अर्धा कप पाणी

कृती:-

वरील साहित्याचा पोळीच्या कणकेपेक्षा थोडा घट्ट गोळा भिजवावा. एक ओलसर कापड घेऊन हा गोळा त्याने झाकावा. साधारण १५ मिनिटांनी या गोळ्याचे समान भाग करून मोठी पोळी लाटावी. एका छोट्याशा वाटीने छोट्या छोट्या पुऱ्या कापून घ्याव्यात. त्या देखील ओलसर कपड्यात झाकून ठेवाव्यात. सगळ्या पुऱ्या तयार झाल्या की गरम तेलामध्ये पुऱ्या तळाव्यात. पुऱ्या तळताना झाऱ्याने त्या तेलात खाली दाबाव्यात. म्हणजे पुऱ्या फुगायला मदत होईल.

अशाप्रकारे पुऱ्या तयार झाल्या की पाणीपुरीचे झणझणीत पाणी बनवावे.

पाणीपुरीचे पाणी

साहित्य :-

१. १ कप पुदिन्याची पानं

२. १ कप कोथिंबीर

३. २ ते ३ मिरच्या

४. ३ चमचे चिंचेचा कोळ

५. ३ चमचे लिंबू रस

६. १ चमचा जीरं पूड

७. १/४ चमचा काळी मिरी पावडर

८. १ चमचा काळं मीठ

९. १/४ चमचा सुंठ पूड

१०. १ चमचा मीठ

११. पाव चमचा हिंग

कृती :-

वरील सर्व जिन्नस एकत्र करून मिक्सरमधून काढावेत. ही पेस्ट गाळून घ्यावी. गाळलेल्या पाण्यात अजून ३ कप पाणी मिसळावे. मिठाचा अंदाज पुन्हा एकदा घ्यावा. पाणीपुरीचे पाणी तयार!!

पाणीपुरीमध्ये पुऱ्या व पाणी हे दोन महत्वाचे टप्पे आपण बघितले. याशिवाय अजूनही काही तयारी करावी लागते. पांढरे वाटाणे साधारण ६ ते ८ तास पाण्यात भिजत ठेवावेत. ज्या पाण्यात हे वाटाणे भिजवले आहेत त्या पाण्यासाहित कुकरमध्ये हळद व मीठ घालून हे वाटाणे उकडावेत. पाणीपुरी serve करताना पुरीला मधोमध भोक पडावे व त्यात उकडलेले पांढरे वाटाणे, बारीक चिरलेला कांदा, टोमॅटो, चिंचेची गोड चटणी, बारीक शेव, कोथिंबीर व सर्वात शेवटी पाणीपुरीचे पाणी घालावे. इतर सर्व जिन्नस पुरीमध्ये घालून केवळ चिंचेची गोड चटणी आणि पाणीपुरीची चटणी वेगवेगळ्या वाट्यांमध्ये देऊनही पाणी पुरी serve करता येते.

चिंचेच्या गोड चटणीची कृती blog वर जरूर पहावी.

वाढणी :- ३ ते ४ माणसे.

चिंचेची गोड चटणी

साहित्य :-

१. २ चमचे चिंचेचा कोळ

२. २ कप कोमट पाणी

३. १/२ कप किसलेला गूळ

४. १ चमचा मीठ

५. १ चमचा गरम मसाला

६. १ चमचा तिखट

७. १ चमचा जीरं पूड

८. १ चमचा बडीशेप पावडर

कृती :-

२ कप कोमट पाण्यात २ चमचे चिंचेचा कोळ मिक्स करून घ्यावा.गूळ घालून पुन्हा एकजीव करावे. एका पातेल्यात हे मिश्रण घेवून शिजवत ठेवावे. उकळी आली की त्यात इतर सर्व जिन्नस घालावेत. मध्यम आचेवर हे मिश्रण उकळत ठेवावे. सतत ढवळावे. हे मिश्रण ज्या डावाने ढवळत आहात त्या डावाला हे मिश्रण चिकटू लागले की ही चटणी तयार झाली असे समजावे. सुरुवातीच्या पातळपणापेक्षा ही चटणी बरीच दाट होते.

ही चटणी भेळ, पाणीपुरी, सामोसा चाट, रगडा पॅटीस यासारख्या कुठल्याही चाट प्रकारात वापरता येते.

जीरा राईस

साहित्य :-

१. १ वाटी बासमती तांदूळ

२. ३ वाट्या पाणी

३. जीरं १ चमचा

४. कोथिंबीर

५. १ ते २ चमचे तेल.

६. चवीनुसार मीठ

कृती:-

प्रथम बासमती तांदूळ धुवून घ्यावा. जीरा राईस करण्यासाठी तसा कुठल्याही प्रकारचा तांदूळ वापरता येऊ शकतो. पण बासमतीचा स्वाद काही निराळाच येतो. हा भिजवलेला तांदूळ पाणी घालून शिजवत ठेवावा.चवीनुसार मीठ घालावे. प्रथम मोठ्या आचेवर तांदूळ शिजवावा. त्याला जो स्टार्च येईल तो वरचे वर काढून घ्यावा. भात पूर्ण शिजला की उरलेला पाणी गाळून घेऊन भात गार होऊ द्यावा. भात गार झाला की मग एका कढईमध्ये तेल तापवावे त्यात जीरं घालावं व शिजलेला भात घालून छान मिक्स करून घ्यावा. वरून कोथिंबीर पेरून गरम गरम serve करावं.

वाढणी :- २ ते ३ माणसे

नवरत्न कुर्मा

साहित्य :-

१. अर्धी वाटी श्रावण घेवडा

२. अर्धी वाटी गाजर

३. अर्धी वाटी बटाटा

४. अर्धी वाटी मटारचे दाणे

५. पाव वाटी सिमला मिरची

६. अर्धी वाटी पनीर

७ . मध्यम आकाराचा कांदा

८ . १ चमचा आलं

९ . १ चमचा लसूण

१० . ८ ते १० काजू

११ . अर्धा चमचा तिखट

१२ . अर्धा चमचा गरम मसाला

१३. पाव चमचा हळद

१४. पॅपरीका

१५. अर्धा कप heavy whipping cream

१६. पाव चमचा जीरं

१७. १ वाटी टोमॅटो प्युरे

१८. अननस, सफरचंद, द्राक्षं प्रत्येकी ३ ते ४ चमचे

१९. बेदाणे ३ ते ४ चमचे

कृती :- मसाला

प्रथम तेलावर चिरलेला कांदा, चिरलेला आलं, लसूण व काजू परतून घ्यावेत. हा मसाला मिक्सरमधून बारीक वाटावा. हा मसाला बनवून ठेवला तर फ्रीज मध्ये साधारण २ ते ३ आठवडे चांगला टिकतो व पनीर- मटर, मशरूम- मटर, कोफ्ता करीची करी बनवण्यासाठी वापरता येतो.

भाजीची कृती :-

सर्व भाज्या चौकोनी कापून घ्याव्यात. एका कढईमध्ये मध्यम आचेवर तेल तापवून घ्यावे. मग या तेलावर प्रथम भाज्या परतून घ्याव्या. कढईच्या मधोमध जागा करून पनीर चे चौकोनी तुकडे त्यात घालावेत व परतून घ्यावे. पनीर तळू नये. पनीर पहिले तळून घेतलं तर त्याचा मऊपणा जाऊन ते चिवट होतं. मग त्यात वरील मसाला घालावा. थोडावेळ परतून मग टोमॅटो प्युरे घालावी. थोडसं पाणी घालून भाजी थोडावेळ शिजवावी. मग त्यात हळद, तिखट, गरम मसाला, पॅपरीका व मीठ घालून भाजी सारखी करून घ्यावी. भाजी पूर्ण शिजली की मग त्यात अननस, सफरचंद व द्राक्षं घालावीत. बेदाणे घालून भाजी परत शिजू द्यावी. आवश्यक वाटल्यास थोडे पाणी घालावे. सर्वात शेवटी whipping cream घालून भाजी अजून २ मिनिटं शिजवावी. ही भाजी पोळी सोबत किंवा जीरं राइस सोबत अतिशय छान लागते.

वाढणी :- २ ते ४ माणसे

कणकेचे चविष्ट धिरडे

साहित्य :-

१. वाटीभर गव्हाची कणिक

२. २ ते ३ चमचे तांदुळाची पिठी

३. चिमूटभर हळद

४. अर्धा चमचा तिखट

५. अर्धा चमचा गोडा मसाला

६. अर्धा चमचा जीरं पूड

७. २ चमचे दही

८. चवीनुसार मीठ

९. कपभर पाणी

१०. आलं लसूण प्रत्येकी पाव चमचा (हे धिरड लहान मुलांसाठी बनवत असला तर आलं लसूण नाही घातलं तरी चालेल.)

कृती:-

प्रथम पाणी सोडून सर्व जिन्नस एकत्र करावेत. मग हळू हळू पाणी घालत गुठळ्या होणार नाहीत अशाप्रकारे सर्व एकत्र करावे. साधारणपणे डोशाच्या पिठासारखं दाट पीठ असावं. तवा मध्यम आचेवर तापवून लगेचच धिरडी घालायला सुरुवात करावी. ही धिरडी तव्यावर जास्त पसरवू नयेत. इतर धीरड्यासारखी ही धिरडी तव्यावरून उलटायला थोडी त्रासदायक ठरतात. पण ज्या लहान मुलांना नुकताच भात द्यायला सुरु केला असेल त्यांना चवीत बदल म्हणून ही धिरडी अतिशय चांगली आहेत.

वाढणी :- १ ते २ माणसे.

आंब्याचे आईसक्रीम

साहित्य :-

१. १६ oz whipped cream

२. १४ oz condensed milk

३. १२ oz evaporated milk

४. आंब्याचा पल्प ३० oz

कृती :-

वरील सर्व साहित्य एकत्र करावं व गुधल्या न ठेवता मिक्स करावं. एका मोठ्या डब्यात भरून freezer मध्ये किमान ७ ते ८ तास ठेवावं. serve करताना आईसक्रीम च्या कप मध्ये किंवा कोन मध्ये द्यावा. आंब्याच्या ऐवजी तुम्हाला आवडतील ते flavors वापरून हे आईसक्रीम बनवता येते.हे आईस्क्रीम कुठल्याही flavors शिवाय नुसतं वेलची पूड आणि केशर घालून कुल्फी म्हणून देखील serve करता येईल.

दुधी मुग डाळ

साहित्य :-

१. छोटा दुधी भोपळा

२. १ वाटी मुग डाळ

३. २ लाल मिरच्या

४. अर्धा चमचा आलं

५. अर्धा चमचा लसूण

६. ४ ते ५ कढीपत्ते

७. अर्धा चमचा हळद

८. चवीपुरता मीठ

९. कोथिंबीर

कृती:-

दुधी भोपळ्याची सालं व मधल्या बिया काढून थोडेसे मध्यम आकाराचे तुकडे करून घ्यावेत. कुकरमध्ये तेलाची फोडणी करावी. त्यात मोहरी व जीरं घालावं. ते तडतडले की त्यात कढीपत्ते व लाल मिरच्या घालाव्यात. हळद घालावी. आलं लसूण घालून मिनिटभर परतावे. दुधीच्या फोडी घालाव्यात व मुगाची डाळ घालावी. २ ते ३ मिनिटं मध्यम आचेवर छान परतून घ्यावे. मग त्यात १ ते १ १/२ वाटी पाणी घालावे. चवीपुरते मीठ घालावे. व कुकरचे झाकण लावून भाजी १ ते २ शिट्ट्या होईपर्यंत परतावी. कुकरचे झाकण पडले की भाजी bowl मध्ये काढून वरून कोथिंबीर पसरून गरम गरम serve करावी.

वाढणी :- २ ते ३ माणसे.

मैद्याच्या कडक पुऱ्या

साहित्य :-

१. १/२ कप मैदा

२. चवीनुसार मीठ

३. १ चमचा ओवा

४. कणिक मळायला पाणी

कृती :-

वरील सर्व साहित्य एकत्र करून पोळीच्या कणकेप्रमाणे कणिक मळून घ्यावी. थोडावेळ ती कणिक झाकून ठेवून मग त्याच्या पुऱ्या लाटायला घ्याव्यात. पुरी लाटली की त्याला सुरीने चिरा पाडाव्यात म्हणजे ती पुरी फुगणार नाही व कुरकुरीत होईल. त्या चिरा पाडलेल्या पुऱ्या तेलात तळून घ्याव्यात. या पुऱ्या प्रवासात नेण्यासाठी अतिशय उपयोगी होतात व साधारण ४ - ५ दिवस छान टिकतात.

वाढणी :- या साहित्याच्या साधारण १५ ते २० पुऱ्या होतील

भटुरे

साहित्य :-

१. पाव कप कणिक

२. ३/४ कप मैदा

३. चवीनुसार मीठ

४. २ चमचे घट्ट दही

५. १ चमचा तेल

६. कणिक मळण्यासाठी कोमट पाणी

७. १ चमचा यीस्ट

८. तळणीसाठी तेल

कृती :-

कणिक, मैदा, मीठ, दही, १ चमचा तेल, १ चमचा यीस्ट या सर्व गोष्टी एकत्र कराव्यात. तेल आणि दही पिठामध्ये पूर्णपणे एकत्र झाले पाहिजे. मग त्यात हळू हळू कोमट पाणी घालून त्याची छान मऊसर कणिक मळून घ्यावी. थोडासा तेल हातावर घेऊन ही कणिक पुन्हा ४ ते ५ मिनिटे छान मळून घ्यावी. ओल्या कपड्यामध्ये ही कणिक झाकून उबदार जागी ठेवावी. १ तासाने कणकेचा हा गोळा यीस्टमुळे फुगलेला दिसेल. या गोळ्याचे छोटे छोटे गोळे करावेत. गोळे करताना कुठेही त्याला घडी पडणार नाही याची काळजी घ्यावी नाहीतर भटुरा तेलात फुलणार नाही. हे छोटे गोळे लाटण्याने लाटावेत व गरम तेलात तळून घ्यावेत. मसालेदार छोले व गरम गरम भटुरे serve करावेत.

जर यीस्ट उपलब्ध नसेल तर मैदा व कणिक यासोबत १/२ चमचा बेकिंग सोडा आणि १/२ चमचा बेकिंग पावडर घालावी व बाकीची सर्व कृती वरीलप्रमाणेच करावी. पण यीस्ट असलेली कणिक १ तासानंतर जेवढी फुलून येईल तेवढी सोडा व बेकिंग पावडर घातलेली कणिक फुलणार नाही.

वाढणी :- २ ते ३ माणसे

मोड आलेल्या मुगाची उसळ

साहित्य :-

१. मुग १ वाटी

२. ३ वाट्या पाणी

३. अर्धी वाटी बारीक चिरलेला कांदा

४. अर्धी वाटी बारीक चिरलेला टोमाटो

५. अर्धा चमचा तिखट

६. धणे जिरे पूड प्रत्येकी १ चमचा

७. गोडा मसाला २ चमचे

८. अर्धा चमचा हळद

९. आलं लसूण किसून प्रत्येकी अर्धा चमचा

१०. फोडणीसाठी तेल

११. कढीपत्ता ७ ते ८ पानं

१२. मीठ चवीनुसार

कृती :-

प्रथम अख्खे मुग ३ पात पाण्यात भिजत घालावेत. रात्रभर मुग भिजले की सकाळी त्यातील पाणी निथळून हे मुग एका पातळ कपड्यात हलक्या हाताने बांधून ठेवावेत. खूप घट्ट बंधू नयेत. हे बांधलेले मुग एका पातेल्यात ठेवून वरून झाकावेत व उबदार जागी ठेवावेत. उन्हाळ्याच्या दिवसात कुठल्याही कडधान्याला मोड लवकर येतात. हिवाळ्यामध्ये मोड यायला साधारणपणे दीड दिवस लागतो. मुगाला मोड आले की अगदी जेवढे मुग तेवढेच पाणी घेऊन कुकर मध्ये शिजवून घ्यावेत. मुग शिजले की एका कढईमध्ये ३ ते ४ चमचे तेल घेऊन ते तापले की त्यात मोहरी, हिंग व कढीपत्ता घालावा. कढीपत्ता तडतडला की त्यात चिरलेला कांदा व आलं लसूण घालावे. कांदा मऊ होईपर्यंत परतावे. मग त्यात हळद, तिखट, धणे जिरे पूड, गोडा मसाला हे सर्व घालून मिनिटभर परतावे. मग चिरलेला टोमाटो घालावा. तो मऊ झाला की त्यात मोड आलेले शिजलेले मुग घालावेत. ही उसळ पातळ फावी असेल तर थोडे पाणी व चवीनुसार मीठ घालून छान उकळी आणावी. कोथिंबीर घालून छान सजवावी व पोळी किंवा भातासोबत ही उसळ गरम गरम serve करावी.

वाढणी :- २ ते ३ माणसे.

पालक मुग डाळ भाजी

साहित्य :-

१. ४ ते ५ वाट्या चिरलेला पालक

२. अर्धी वाटी मुग डाळ

३. पाव वाटी उडदाची डाळ

४. २ हिरव्या मिरच्या

५. अर्धा चमचा आलं

६. अर्धा चमचा लसूण

७. अर्धी वाटी उभा चिरलेला कांदा

८. फोडणीसाठी तेल

९. ६ ते ७ कढीपत्त्याची पानं

१०. चवीपुरतं मीठ

कृती :-

एका कढईमध्ये तेल तापवावे. त्यामध्ये पहिले थोडी उडदाची डाळ घालावी. डाळीचा रंग हलकासा बदलला की त्यात मुग डाळ घालावी. मुगाच्या डाळीचा रंग बदलला की त्यात मिरची, आलं व लसूण घालून मिनिटभर परतावे. उभा चिरलेला कांदा घालावा. तो मऊसर झाला की त्यात कढीपत्ता घालावा. हळद घालावी व चिरलेला पालक आणि मीठ घालावे. मिठाने पालकाला पाणी सुटते व त्याच पाण्यात पालक आणि डाळी शिजवाव्यात. ही गरम गरम भाजी पोळी किंवा फुलक्यासोबत फारच छान लागते.

वाढणी :- २ ते ३ माणसे.

साबुदाणा वडा

साहित्य :-

१. साबुदाणा १ वाटी

२. दाण्याचे कूट अर्धी वाटी

३. १ मध्यम आकाराचा बटाटा

४. जीरं १ चमचा

५. मिरची १ चमचा

६. चिमूटभर सोडा

७. पाव वाटी बारीक चिरलेली कोथिंबीर

८. मीठ चवीनुसार

९. तळणीसाठी तेल

कृती :-

प्रथम साबुदाणा पाण्यात भिजवावा. जेवढा साबुदाणा त्याच्यापेक्षा रेषभर जास्त पाणी घालावे आणि हा साबुदाणा ५ ते ६ तास भिजवावा. बटाटा शिजवून घेऊन mash करून घ्यावा. भिजवलेला साबुदाणा, mash केलेला बटाटा, दाण्याचे कूट, जीरं, मीठ, सोडा, कोथिंबीर हे सर्व जिन्नस एकत्र करावेत. हाताला थोडे पाणी लावत लावत त्याचे वाडे करून घ्यावेत. तेल गरम करावे व वडे छान सोनेरी रंगावर तळून घ्यावेत व दह्यासोबत गरम गरम serve करावेत. यामध्ये कुरकुरीत पणासाठी वारीचे तांदूळ घातले जातात. तुम्हाला आवडत असल्यास घालावेत. पण त्याशिवायदेखील हे वडे छान कुरकुरीत होतात आणि फुलतात.

वाढणी :- २ ते ३ माणसे.

मुगाच्या डाळीचे वडे

साहित्य :-

१. २ वाटी मुगाची डाळ

२. ४ ते ५ वाटी पाणी

३. २ हिरव्या मिरच्या

४. १ चमचा आलं

५. १ चमचा लसूण

६. चवीनुसार मीठ

७. १ चमचा जीरं

८. कोथिंबीर

९. तळण्यासाठी तेल

कृती :-

प्रथम मुगाची डाळ ७ ते ८ तास पाण्यामध्ये भिजवावी. त्यानंतर मुगाची डाळ कमीत कमी पाणी घालून मिक्सरमध्ये वाटावी. त्यात आलं, लसूण, मीठ, मिरच्या, जीरं हे सर्व घालून वाटावे. थोडेसे जाडसर वाटावे. थोडी बारीक चिरलेली कोथिंबीर या पिठात घालावी व तापलेल्या तेलामध्ये चमच्याने छोटे छोटे गोळे सोडावेत. छान खरपूस सोनेरी रंग येईपर्यंत टाळावेत. व कुठल्याही चटणी सोबत गरम गरम serve करावेत.

वाढणी :- वरील साहित्यात १५ ते १८ वडे होतील.

स्पाँज केक

साहित्य :-

१. १ कप मैदा

२. अर्धा चमचा बेकिंग सोडा

३.१ कप पिठीसाखर

४. ६ अंडी

५. १ चमचा व्हॅनिला इसेन्स

कृती :-

प्रथम अंडी फोडावीत व पांढरा बलक व पिवळा बलक वेगळा करावा. पांढरा बलक व्हीप होईपर्यंत फेटावं. अर्थात त्या पांढऱ्या बालकाचे हलके क्रीम तयार झाले पाहिजे. पिवळे बलक वेगळे फेटून घ्यावे. त्यात पिठीसाखर व व्हॅनिला इसेन्स घालून पुन्हा फेटून घ्यावे. मैदा व बेकिंग सोडा चाळणीतून चाळून घ्यावा. फेटलेले पांढरे बलक व पिवळे बलक एकत्र करावं व त्यात मैदा घालावा. अगदी हळुवार हाताने एखाद्या चमच्याने सर्व मिश्रण एकत्र करावं. ओव्हन ३५०f ला preheat करून घ्यावा. केक चे मिश्रण एका baking tray मध्ये घालून ३० ते ४० मिनिटे ओव्हन मध्ये ठेवावे. ३० मिनिटांनी एखादी सुरी किंवा toothpick केक मध्ये घालून बघावी. जर त्याला केक चिकटला नाही तर केक तयार झाला असे समजावे. नाहीतर अजून ५ ते १० मिनिटे केक bake करावा.

केक तयार झाल्यावर तो गार झाला की मग त्यावर whipped cream ने आपल्याला आवडेल तशी सजावट करावी.

केक मध्ये जर अंड चालत नसेल तर तुम्ही फ्लेक्स सीडची पावडर करून वापरू शकता. १ अंड = १ चमचा फ्लेक्स सीड पावडर.

बन सँडविच

साहित्य :-

१. बर्गरसाठी वापरले जाणारे बन ४

२. १ वाटी पातळ गोल चिरलेली काकडी

३. १ वाटी पातळ गोल टोमॅटोचे काप

४. १ वाटी किसलेले गाजर

५. पाव वाटी कांद्याचे बारीक गोल काप

६. अर्धी वाटी केचअप

७. अर्धी वाटी किसलेले चीज

८. कोथिंबीर चटणी (ह्या चटणीच्या कृतीसाठी चटणी/ तोंडीलावणं हा thread पाहावा.)

९. स्प्रेड चीज किंवा लोणी

कृती :-

प्रथम बन दोन भागात विभागून त्याला स्प्रेड चीज किंवा लोणी लावून घ्यावे. त्याच्यावर चटणी लावावी. काकडी, टोमॅटो , गजर, किसलेले चीज व केचअप घालून बन बंद करून घ्यावा. आवडेल त्या प्रमाणे बनला अर्धा किवा त्रिकोणी काप घेऊन सँडविच serve करावे.

वाढणी :- २ माणसे

लाल टोमॅटोची हिरवी चटणी

साहित्य :-

१. १ टोमॅटो

२. कोथिंबिरीची १ जुडी

३. २ पेर आलं

४. ३ लसणाच्या पाकळ्या

५. चवीनुसार मीठ

६. अर्धा चमचा साखर

कृती :-

वरील सर्व जिन्नस मिक्सर मधून कमीत कमी पाणी घालून बारीक वाटून घ्यावेत. लाल टोमॅटोची हिरवी चटणी तयार. ही चटणी कुठल्याही प्रकारच्या सँडविचमध्ये छान लागते.

अंगूर मलाई

साहित्य :-

१. १० ते १२ कप दूध

२. अर्धा कप लिंबू रस

३. अर्धा कप पाणी

४. अडीच कप साखर

५. ६ कप पाणी

६. १ ते २ चमचे मैदा

७. कापलेले बदाम, पिस्ते सजावटीपुरते

८. अर्धा चमचा वेलची पूड

९. चिमूटभर केशर

कृती :-

प्रथम जाड बुडाच्या पातेल्यामध्ये ६ ते ७ कप दूध उकळत ठेवावे. दूध पातेल्याला खाली चिकटणार नाही याची सतत काळजी घ्यावी. आच मध्यम असू द्यावी. दुधाला उकळी आली की आच मंद करावी. लिंबू रस पाण्यामध्ये एकत्रित करून हळूहळू उकळी आलेल्या दूधात घालावे. दूध सतत ढवळावे. थोडेसे ढवळल्यावर पनीर व पाणी वेगवेगळे होताना दिसू लागेल. आच बंद करावी. थोडासा वेळ दूध ढवळावे. एका चाळणीत एक पातळ कापड घालून हे पनीर गाळून घ्यावे. (गाळून शिल्लक राहिलेले पाणी पोळीची कणिक मळायला वापरले जाऊ शकते.) या गाळलेल्या पनीर वर गार पाणी सोडावे. गार पाणी सोडल्याने पनीर घट्ट होत नाही. अंगूर बनवण्यासाठी अत्यंत मऊ पनीर ची गरज असते. भाजीसाठीचे पनीर थोडे घट्ट असते. थोडावेळ हे पनीर टांगून ठेवावे. त्यातील पाणी गाळले गेले पाहिजे. मग हे पनीर परातीमध्ये घ्यावे. तळहाताने थोडे थोडे पनीर मळून घ्यावे. पनीर मध्ये अजिबात गुठळ्या राहणार नाहीत याची काळजी घ्यावी. या पनीर मध्ये १ चमचा मैदा घालून त्याचे छोटे छोटे गोळे बनवावेत. ३/४ कप साखर व त्यात ५ कप पाणी घालावे. या पाकाला उकळी आली की पनीर चे गोळे त्यात घालून झाकण लावून ५ मिनिटे शिजवावेत. शिजले की या गोळ्यांचा आकार दुप्पट होतो. हा साखरेचा पाक दाट होता कामा नये. प्रत्येक वेळेला गोळे शिजवताना थोडे पाणी वाढवावे. पाव कप साखर व १ कप पाणी एकत्र करून कोमट करून घ्यावे. हे पाणी आचेवर ठेवू नये. शिजलेले पनीर या कोमट पाण्यात काढावेत. हे सर्व होताना उरलेले दूध आटवत ठेवावे. ६ कप दूध आटवत ठेवले असेल तर त्याचे ३ कप होईपर्यंत आटवावे. उरलेली दीड कप साखर या दूधात घालावी. वेलची व केशर घालावे. कोमट पाण्यातले अंगूर ५ ते ७ मिनिटांनी हातामध्ये हळुवार दाबून घ्यावेत व आटवलेल्या दूधामध्ये सोडावेत. अंगूर मलाई गार झाली की बदाम व पिस्ते घालून serve करावी.

वाढणी :- ४ ते ५ माणसे

तिखटामिठाच्या पुऱ्या

साहित्य :-

१. २ वाट्या गव्हाची कणिक

२. चवीनुसार मीठ

३. अर्धा चमचा तिखट

४. अर्धा चमचा जीरं पूड

५. अर्धा चमचा धणे पूड

६. १ चमचा गोडा मसाला

७. अर्धा चमचा चाट मसाला

८. १ चमचा गरम तेलाचे मोहन

९. पाव वाटी कोथिंबीर

१०. कणिक मळायला पाणी

११. तळण्यासाठी तेल

कृती :-

वरील सर्व जिन्नस एकत्र करावेत. पाणी घालून थोडी घट्ट कणिक मळावी. १५ ते २० मिनिटे कणिक झाकून ठेवावी. एका कढईमध्ये तेल तापत ठेवावे. कणकेचा छोटा गोळा घेवून तो गोल लाटावा व गरम तेलात दोन्ही बाजूनी पुरी छान तळून घ्यावी. गरम गरम खायला द्यावी.

वाढणी :- या साहित्यात साधारण ८ ते १० पुऱ्या होतील.

शेजवान सॉस

साहित्य :-

१. छोटा अर्धा कांदा

२. छोटा टोमॅटो

३. ४ ते ५ कसून पाकळ्या

४. आलं २ चमचे

५. ७ ते ८ ओल्या लाल मिरच्या

कृती :-

कांदा, टोमॅटो, लसूण, आलं, लाल मिरच्या या सर्व गोष्टी बारीक चिरून घ्याव्यात. प्रथम तेलावर कांदा मऊ होईपर्यंत परतावा. त्यात आलं लसूण घालून परतावे. आलं व लसणाचा वास यायला लागल्यावर त्यात टोमॅटो घालावा. सर्वात शेवटी मिरच्या घालाव्यात व अगदी मंद आचेवर हा सॉस घट्ट होईपर्यंत शिजवावा. थोडेसे मीठ घालावे. म्हणजे शेजवान सॉस तयार होईल.

हा सॉस चायनीज हक्का नुडल्स तसेच फ्राईड राइसमध्ये खूप छान लागतो. या सॉस ने चायनीज पदार्थाला वेगळीच चव येते.

चायनीज फ्राईड राइस

साहित्य :-

१. उभा चिरलेला कोबी अर्धी वाटी

२. उभा चिरलेला श्रावण घेवडा पाव वाटी

३. उभं चिरलेलं गाजर पाव वाटी

४. उभी चिरलेली सिमला मिरची पाव वाटी

५. ४ वाट्या शिजलेला बासमती तांदूळ (तांदूळ कुठलाही वापरला तरी चालेल पण बासमती तांदुळाचा भात मोकळा होतो.)

६. ४ चमचे सोय सॉस

७. २ चमचे टोमॅटो केचअप

८. पाव चमचा चिली सॉस

९.पाव वाटी कांद्याची पात

कृती :-

बासमती तांदूळ प्रथम भिजवून ठेवावा. ४ पट पाणी एका पातेल्यात घ्यावे व त्याला उकळी आणावी. या पाण्यात थोडेसे मीठ घालावे. भिजवलेला तांदूळ घालून भात मोकळा शिजवावा. भात शिजला की जास्तीचे पाणी गाळून घ्यावे. सर्व भाज्या उभ्या चिराव्यात. एका पसरट कढईमध्ये थोडेसे तेल घ्यावे. तेल तापले की त्यात कोबी, गाजर, सिमला मिरची, श्रावण घेवडा या सर्व भाज्या घालाव्यात. भाज्या मऊ होईपर्यंत परतावे. मग त्यात सोय सॉस, टोमॅटो केचअप व चिली सॉस घालावा. सर्व भाज्यांना सॉस एकसारखा लागला की भाज्या एका बाजूला घेऊन एक अंड त्या कढईतच फोडून घालावं व छान परतून घ्यावं. सर्व भाज्या त्या अंड्यासोबत एकत्र कराव्यात व त्यात शिजलेला भात घालून नीट एकजीव करून घ्यावा. अंड आवडत नसल्यास नाही घातलं तरी चालेल. कांद्याची पात पेरून हा भात गरम गरम serve करावा.

जर थोडा चटपटीत भात आवडत असेल तर शेजवान सॉस घालावं. शेजवान सॉस कसा बनवावा ते चायनीज च्या thread वर बघावे.

वाढणी :- २ ते ३ माणसे