पनीर पुलाव

साहित्य :-

१. १ कप भिजवलेला बासमती तांदूळ 

२. १ कप चौकोनी कापलेले पनीर 

३. अर्धा चमचा किसलेलं आलं

४. अर्धा चमचा किसलेलं लसूण 

५. अर्धा ते १ चमचा वाटलेली हिरवी मिरची 

६. १ चमचा गरम मसाला 

७. २ चमचे दही 

८. ३ चमचे टोमॅटो केचअप 

९. चिरलेली कोथिंबीर 

१०. चवीनुसार मीठ 

११. अर्धा कप उभा चिरलेला कांदा 

१२. फोडणीसाठी तेल व बटर प्रत्येकी १ चमचा 

१३. २ कप गरम पाणी 

१४. चिमुटभर साखर 

कृती:-

प्रथम कुकरमध्ये थोडं तेल व बटर घालावं. दोन्ही तापलं की मग त्यात कांदा घालावा. कांदा मऊ होईपर्यंत परतावा. मग त्यात आलं, लसूण, व हिरवी मिरची घालावी. छान मिक्स करून घ्यावे. मग त्यात टोमॅटो केचअप घालावे. थोडा परतून लगेचच भिजवलेला तांदूळ घालावा. परतून घ्यावे. मग पनीरचे तुकडे घालून हलक्या हाताने मिक्स करावे. गरम पाणी घालून तांदूळ नीट ढवळून घ्यावा. मग त्यात मीठ, दही व गरम मसाला घालावा. चिमुटभर साखर घालावी व ढवळून घेऊन पाण्याची चव घेऊन बघावी. कुकरचे झाकण लावून २ शिट्ट्या करून घ्याव्यात. कुकरची वाफ दडपली की भात हलक्या हाताने मोकळा करून घ्यावा. serve करताना वरून बारीक चिरलेली कोथिंबीर घालावी.

वाढणी :- ३ ते ४ माणसे 

बटाटा वडा सांबार

वड्यासाठीचे साहित्य :-

१. उकडलेले बटाटे ३ ते ४

२. २ हिरव्या मिरच्या 

३.  आलं, लसूण प्रत्येकी २ चमचे

४. कोथिंबीर 

५. चवीनुसार मीठ 

६. अर्धा कप डाळीचं पीठ 

७. अर्धा चमचा तिखट 

८. पाव चमचा खायचा सोडा 

९. चवीनुसार मीठ 

१०. १ ते सव्वा कप पाणी 

सांबारचे  साहित्य :-

११. १ कप भिजवलेली तुरीची डाळ 

१२. १ ते २ लहान वांगी 

१३. पाव कप चिरलेला दुध्या 

१४. ४ ते ५ भेंड्या 

१५. अर्धा कप उभा चिरलेला कांदा 

१६. १ मध्यम आकाराचा टोमॅटो बारीक चिरून

१७. अर्धा चमचा तिखट 

१८. १ चमचा धणे पूड 

१९. अर्धा चमचा जीरं पूड 

२०. १ चमचा सांबार मसाला 

२१. अर्धा चमचा हळद 

२२. कढीपत्त्याची पाने 

२३. शेवग्याच्या शेंगा २

कृती :-

उकडलेले बटाटे हाताने कुस्करून घ्यावेत. त्यात हिरवी मिरची, आलं व लसूण वाटून घालावं. त्यात चवीनुसार मीठ व कोथिंबीर घालून व्यवस्थित एकजीव करून घ्यावं. त्याचे गोळे करून घ्यावेत. डाळीच्या पिठात तिखट, मीठ, सोडा व हळद घालावी. थोडं थोडं पाणी घालत दाटसर असा घोळ बनवून घ्यावा. गुठळ्या होऊ देऊ नयेत. ५ मिनिटे थांबून मग वडे करायला घ्यावेत. कढईमध्ये तेल तापवावे. बटाट्याचा प्रत्येक गोळा डाळीच्या पिठामध्ये घोळवून तेलात सोडवा. मध्यम आचेवर छान सोनेरी रंगावर वडे टाळून घ्यावेत. तोवर कुकरमध्ये तेल तापवावे. त्यात मोहरी,कढीपत्ता व हळद घालून फोडणी करावी. त्यात कांदा मऊ होईपर्यंत परतावा. धणे जीरं पूड, तिखट, सांबार मसाला व रंगासाठी पाप्रिका घालावं. मसाला थोडा परतून त्यात टोमॅटो घालावेत. ते परतले की मग भाज्या घालाव्यात. तुरीची भिजवलेली डाळ त्यात घालावी. शेवग्याच्या शेंगाही घालाव्यात. डाळीच्या दुप्पट पाणी घालावं व मीठ घालून कुकर बंद करावा व ३ शिट्ट्या करून घ्याव्यात. सांबार तयार झाला की त्याचा दाटपणा तपासून घ्यावा. आवश्यक वाटल्यास थोडं पाणी घालून सांबार पुन्हा उकळून घ्यावं. आता एका बाऊल मध्ये पहिले वडा घालून त्यावर सांबार घालावा. वरून कोथिंबीर व शेव घालून गरम गरम serve करावे.

थंडीच्या दिवसात किंवा पाऊस पडत असताना असा गरम गरम वडा सांबार अधिकच चविष्ट लागतो.

वाढणी:- २ ते ३ माणसे.

रव्याचे पॅनकेक

साहित्य :-

१. २ कप रवा 

२. पाऊण कप दही 

३. अर्धा कप पाणी 

४. १ छोटं गाजर किसून 

५. अर्धी वाटी बारीक चिरलेला कोबी 

६. बारीक चिरलेली हिरवी मिरची किंवा तिखट चवीनुसार 

७. चवीनुसार मीठ 

८. फ्रुट सॉल्ट १ चमचा 

९. १ चमचा किसलेलं  आलं 

कृती :-

एका बाऊलमध्ये रवा, दही व पाणी एकत्र करून घ्यावे व अर्धा तास ठेवून द्यावे. अर्ध्या तासाने त्यात किसलेलं गाजर, चिरलेला कोबी, आलं, मिरची किंवा तिखट आणि चवीनुसार मीठ सर्व घालून मिश्रण छान एकजीव करावं.  त्यात एक चमचा  फ्रुट सॉल्ट घालून लगेचच त्यावर ४ ते ५ चमचे पाणी घालावं. त्याने  फ्रुट सॉल्ट फसफसेल. यानंतर अतिशय हलक्या हाताने हे बॅटर एकजीव करावे. हे बॅटर डोश्याच्या बॅटरपेक्षा थोडे घट्ट असते. आता एका पॅनमध्ये छोटे छोटे पॅनकेक घालावेत व मध्यम आचेवर तेल सोडून परतून घ्यावेत. हे पॅनकेक लहान मुलांसाठी अतिशय healthy आहेत. कुठल्याही हिराव्या चटणीसोबत खावयास द्यावेत.

हे पॅनकेक लाल टोमॅटोच्या हिरव्या चटणीसोबत अतिशय चविष्ट लागतात. या चटणीची कृती ब्लोगवर नक्की पहा.

वाढणी :- वरील साहित्यात ८ ते १० छोटे पॅनकेक होतील.

करंजी

साहित्य :-

१. २ कप खोवलेलं ओलं खोबरं 

२. २ कप + १/४ कप साखर (ज्यांना कमी गोड आवडतं त्यांनी जेवढं खोबरं त्यापेक्षा थोडी कमी साखर घ्यावी.)

३. अर्धा चमचा वेलची पूड 

४. १ कप मैदा 

५. २ चमचे बारीक रवा 

६. ४ चमचे तुपाचे मोहन 

७. चिमुटभर मीठ 

कृती:-

मैदा व रवा एकत्र करून त्यात तुपाचे मोहन व चिमुटभर मीठ घालावे. हे सगळे तूप मैद्यामध्ये एकजीव करून घ्यावे. थोडं थोडं पाणी किंवा दुध घालत घट्ट कणिक मळून घ्यावी. ही कणिक झाकून ठेवावी. खोबरं व साखर एकत्र करून शिजायला ठेवावं. मध्यम आचेवर हे मिश्रण सतत ढवळत शिजवावं. हे सारण थोडं दाट व्हायला लागेल. कढईच्या कडा सुटायला लागल्या की सारण तयार झालं. हे सारण गार होऊ द्यावं. मग मैद्याची मळलेली कणिक घेऊन ती पुन्हा एक ५ मिनिटे छान मळून घ्यावी. त्याचे छोटे छोटे गोळे करून घ्यावेत. एक गोळा घेऊन तो पुरीसारखा लाटून घ्यावा. त्यात खोबऱ्याचे सारण भरून अर्धगोलामध्ये कारंजी बंद करून घ्यावी. या बंद बाजूला कातण्याने अगदी बाहेरच्या बाजूने कापून घ्यावे. कातण नसेल तर काटेचमच्याने बंद बाजू दाबून घ्यावी. या तयार करंज्या ओलसर फडक्याखाली ठेवाव्यात. कढईमध्ये तेल तापवून या करंज्या बदामी रंगावर परतून घ्याव्यात. करंज्या केल्या की नेहेमी एखादा मोदक करावा.

वाढणी :- या साहित्याच्या १२ ते १५ करंज्या होतील.

पातळ पोह्यांचा चिवडा

साहित्य :-

१. ३ कप पातळ पोहे 

२. १ कप चुरमुरे 

३. १० ते १२ कढीपत्त्याची पाने 

४. मुठभर दाणे 

५. मुठभर डाळं 

६. चवीनुसार हिरव्या मिरच्या 

७. अर्धा चमचा हिंग 

८. १ चमचा साखर 

९. तेल व फोडणीचे साहित्य 

१०. चवीनुसार मीठ 

११. १ चमचा हळद 

कृती:-

प्रथम पातळ पोहे चाळणीतून हलक्या हाताने चाळून घ्यावेत. एका कढईमध्ये हे पातळ पोहे कुरकुरीत होईपर्यंत परतून घ्यावेत. एका वर्तमानपत्रावर पोहे काढून घ्यावेत. चुरमुरे देखील थोडे परतून घ्यावेत व पोह्यांवर घालावेत. मग कढईमध्ये भरपूर तेल घेऊन त्यात मोहरी, हिंग, कढीपत्ता, मिरची व हळद  हे सर्व घालून फोडणी करून घ्यावी. त्यात दाणे व डाळं घालून ते परतलं गेलं की ही फोडणीदेखील पोह्यांवर घालावी. मग त्यात साखर व मीठ घालून हलक्या हाताने सर्व पदार्थ मिक्स करावेत. या पोह्यांमध्ये सुक्या खोबऱ्याचे काप सोनेरी रंगावर तळून घालतात. फोडणी करायच्या आधी हे खोबरं तळून पोह्यांवर घालावं. अतिशय खरपूस चिवडा तयार. चुकून जर मिठाचा अंदाज चुकला व चिवडा खारट झाला तर थोडे चुरमुरे भाजून घालावेत. खारटपणा कमी होतो.

वाढणी  :- ४ ते ५ माणसे 

रवा खोबरं लाडू

साहित्य :-

१. २ कप बारीक रवा 

२. अर्धा कप किसलेलं ओलं खोबरं 

३. अडीच कप साखर 

४. थोडं पाणी पाक बनवण्यासाठी 

५. १ चमचा वेलची पूड 

६. चिमुटभर केशर 

७. अर्धी ते पाउण वाटी तूप 

८. बेदाणे 

कृती :-

प्रथम एका पातेल्यात तूप गरम करून त्यावर रवा मध्यम आचेवर खरपूस भाजून घ्यावा.  मग त्यात किसलेलं ओलं खोबरं घालून पुन्हा थोडावेळ परतून घ्यावं. खोबरं घातल्यावर रवा थोडा फुलायला लागेल. एक ५ ते १० मिनिटे परतल्यावर आच बंद करावी. रवा भाजून घेईपर्यंत दुसऱ्या पातेल्यामध्ये साखर घेऊन ती बुडेल इतपत पाणी घालून १ तरी पाक करायला ठेवावा. एकतरी पाक व्हायला साधारणपणे १० ते १५ मिनिटे लागतील. पाक थोडा दाटसर झाला की कणभर पाक दोन बोटांमध्ये धरून त्याला एक तार येते का ते बघावे. तसे झाल्यास पाक तयार झाला असे समजावे. मग त्यात वेलची पूड व केशर घालावे. केशर आधी घातले तर पाकाचा रंग बदलतो म्हणून पाक तयार झाला की केशर घालावे. मग या पाकामधे भाजलेलं रवा खोबरं घालून मिश्रण छान मिक्स करून घ्यावं. या क्षणी हे मिश्रण खूप सैलसर वाटेल पण हे लाडू लगेच वळायचे नसतात. लाडवाचं मिश्रण तयार झालं  की  ते २ ते ३ तास ठेवावं. ३ तासाने हे मिश्रण व्यवस्थित घट्ट झालेलं असेल. फक्त या २ ते ३ तासात मिश्रण मधून मधून ढवळून घ्यावं. आता घट्ट झालेल्या मिश्रणाचे मध्यम आकाराचे लाडू वळावेत व सजावटीसाठी त्यावर बेदाणे लावावेत.

वाढणी :- या साहित्याचे १६ ते २० लाडू तयार होतील.

शंकरपाळी

साहित्य :-

१. १ कप दूध 

२. १ कपापेक्षा थोडीशी जास्त साखर 

३. १ कप तूप 

४. चिमुटभर मीठ 

५. मैदा साधारणपणे ३ ते ४ कप 

६. तळणीसाठी तेल 

कृती:-

एका पातेल्यामध्ये दुध, साखर व तूप एकत्र करून गरम करण्यास ठेवावे. त्यात चिमुटभर मीठ घालावे. या मिश्रणाला उकळी आली की आच बंद करून त्यात हळू हळू मैदा घालण्यास सुरुवात करावी. अगदी पोळीच्या कणकेसारखी पातळ कणिक तयार झाली की ती झाकून ठेवावी. २ ते ३ तासांनी ही कणिक घट्ट झालेली असेल. आता ही कणिक पुन्हा थोडी मळून  घ्यावी. मळताना जर असे वाटले की कणिक परातीला किंवा ओट्याला चिकटत आहे तर त्यात २ चमचे तांदुळाची पिठी किंवा कॉर्नफ्लोर घालावे व कणिक मळावी. मग या कणकेचे मोठो गोळे करून ते पराठ्याप्रमाणे जाडसर लाटून घ्यावेत. कातण्याने किंवा सुरीने या लाटलेल्या पोळीचे चौकोनी तुकडे करावेत. या शंकरपाळ्या एका ताटामध्ये काढून घ्याव्यात. सगळ्या कणकेच्या शंकरपाळ्या तयार झाल्या की तेलामध्ये हळूहळू थोड्या थोड्या शंकरपाळ्या सोडून सोनेरी रंगावर तळून घ्याव्यात. शंकरपाळ्या सोनेरी झाल्या की लगेचच तेलातून काढाव्यात. तेलातून काढल्यानंतर देखील त्या थोड्या जास्त रंग पकडतात. शंकरपाळ्या तळताना तेल कमी पडणार नाही याची काळजी घ्यावी. नाहीतर शंकरपाळ्या तेलात विरघळू शकतात.

वाढणी :- या साहित्याच्या मध्यम आकाराचा डबा भरेल एवढ्या शंकरपाळ्या होतील.

काजू कतली

साहित्य :-

१. १ कप काजू 

२. ३/४ कप पिठीसाखर 

३. ३ ते ४ चमचे पाणी 

४. चिमुटभर केशर 

५. १ चमचा तूप 

कृती:-

काजूची मिक्सरमधून अगदी बारीक पूड करून घ्यावी. पिठीसाखर व काजूची पूड छान  मिक्स करून घ्यावं. एका जाड बुडाच्या पातेल्यामध्ये तूप घालावं. तूप तापलं की त्यात हि पूड घालावी. अगदी मध्यम आचेवर सतत ढवळत राहावे. थोडंसं तेल सुटायला लागलं की मध्ये आळ करून त्यात पाणी घालावं. त्या पाण्यात केशर घालावं. थोडं ढवळून सगळी काजूची पूड व केशराचे पाणी एकजीव करून घ्यावे. यानंतर अगदी २ ते ३ मिनिट परतावे. मिश्रण घट्ट व्हायला लागलं की लगेच एका ताटामध्ये काढून चमच्याच्या मागच्या बाजूने थापून घ्यावे. मिश्रण गार झाले कि वरून त्याला चांदीचा वर्ख लावून हव्या  त्या आकारात कापावे.

वाढणी :- या साहित्यात १० ते १२ काजू कतली होतील.

साबुदाण्याची खिचडी

साहित्य :-

१. १ कप साबुदाणा 

२. पाव कप दाण्याचे कूट

३. २ ते ३ मिरच्या 

४. अर्धा चमचा जीरं 

५. २ ते ३ चमचे तूप 

६. अर्धा चमचा साखर 

७. चवीपुरतं  मीठ 

८. ओलं  खोबरं आणि बारीक चिरलेली कोथिंबीर सजावटीसाठी 

कृती:-

प्रथम साबुदाणा थोड्याश्या पाण्यामध्ये भिजवावा. साबुदाणा कमीत कमी ५ ते ६ तास भिजला पाहिजे. भिजलेला साबुदाणा हाताला अगदी मऊ लागतो. त्याला नख लावले तर लगेच तुटतो. पण तरीही प्रत्येक दाणा अगदी  वेगळा वेगळा दिसतो. अशाप्रकारे साबुदाणा तयार झाला कि मग एका कढईमध्ये तूप तापवून घ्यावं. त्यात जिरं घालावं व ते तडतडलं की मग त्यात हिरव्या मिरचीचे तुकडे घालावेत. फोडणी झाली की लगेचच त्यात भिजलेला साबुदाणा घालावा. दाण्याचं कूट घालावं. मीठ व साखर घालून छान  मिक्स करून घ्यावं. जर खिचडी थोडी कोरडी वाटत असेल तर पाण्याचा हबका मारून झाकण ठेवून एक वाफ आणावी. खोबरं व कोथिंबीर घालून सजवावी व गरम गरम serve करावी. आवडत असल्यास लिंबू  पिळून हि गरम गरम खिचडी खावी.

आवडत असल्यास या खिचडीमध्ये उकडलेला बटाटादेखील घालतात. 

केवळ उपसालाच नाही तर इतर वेळेलाही अशी खिचडी दुपारच्या खाण्यासाठी केली जाते. उपासाच्या दिवसाचा हा अविभाज्य पदार्थ आहे. 

वाढणी :- १ ते २ माणसे.

खवा पोळी

साहित्य :-

१. १ कप खवा

२. १ चमचा बेसन

३. अर्धा चमचा खसखस 

४. २ कप पिठीसाखर

५. ३ ते ४ चमचे साजूक तूप

६. वेलची पूड अर्धा चमचा

७. चिमुटभर केशर

८. १ ते दीड कप कणिक

९. कणिक मळायला पाणी

कृती :-

प्रथम पोळीच्या कणकेपेक्षा थोडी घट्ट कणिक मळून घ्यावी.  कणिक मळताना चिमुटभर मीठ घालावे. गोड पदार्थाला अस मीठ घातल्याने छान चव येते. मग कढईमध्ये २ चमचे तूप घालावे. ते गरम झाले की त्यात खवा परतावा. चं गुलाबी रंग आला खव्याला की तो एका वाडग्यात काढून घ्यावा. परत थोडं तूप घालून त्यावर बेसन भाजून घ्यावं. बेसन छान भाजलं गेलं की ते खव्यामध्ये घालावं. पुन्हा तूप घालून थोडी खसखस भाजून घ्यावी. ती देखील खव्यावर घालावी. या मिश्रणात पिठीसाखर, वेलची पूड व केशर घालावे. चमच्याने दुध घालत हा खवा छान मळून घ्यावा. साधारणपणे मुठीत खवा घट्ट दाबला तर त्याची मुठ तयार झाली पाहिजे इतपत हा खवा मळून घेतला की पोळ्या करायला घ्याव्यात. कणकेच्या २ लाट्या घ्याव्यात. छोट्या दोन पोळ्या लाटून त्यातील एका पोळीवर खव्याची मूड घालावी व वरून दुसरी पोळी ठेवून कडा घट्ट बंद करून घ्याव्यात. हलक्या हाताने पुन्हा पोळी लाटावी. हि पोळी लाटताना थोडी तांदळाची पिठी लावावी. म्हणजे पोळी सहजतेने लाटली जाईल. तवा मध्यम आचेवर तापवून हि पोळी द्नही बाजूनी खरपूस भाजून घ्यावी. पोळी भाजताना बऱ्याचदा खवा बाहेर येतो व फसफसल्यासारखा दिसतो. त्यामुळे तव्याच्या तापमानाकडे लक्ष द्यावे. तवा जास्त तापला तर पोळी तव्यावर फुटू शकते. मध्यम आचेवरच या पोळ्या खरपूस भाजून घ्याव्यात. वरून तूप घालून गरम गरम serve कराव्यात. 

वाढणी :- या साहित्याच्या साधारणपाने १० ते १२ पोळ्या होतील. 

क्रिमी स्पिनच पास्ता

साहित्य :-

१. २ चमचे बटर

२. १ चमचा मैदा

३. अर्धा कप दूध

४. १ कप पालकाची पेस्ट

५. २ ते ३ कप उकडलेला पेने पास्ता

६. अर्धा चमचा चिली फ्लेक्स

७. आलं लसूण पेस्ट प्रत्येकी अर्धा चमचा

८. पाव चमचा काळी मिरी पूड 

९. मिल्क क्रीम पाव कप 

१०. चवीनुसार मीठ

११. किसलेला चीज अर्धा कप 

कृती :-

प्रथम पालकाची पानं उकळत्या पाण्यात ३ ते ४ मिनिटे शिजवावीत. लगेचच ही पानं गार पाण्यात घालावीत. पाणी काढून ही पानं मिक्सरमध्ये वाटून घ्यावीत. एका कढईमध्ये पास्ता उकडून घ्यावा. पास्ता शिजवताना त्यात मीठ घालावं. पास्ता उकडण्याची कृती त्याच्या पॅकवर लिहिलेली असते. पास्ता उकडला की तो गाळून घेऊन त्यावर थोडं तेल घालावं म्हणजे पास्ता एकमेकाला चिकटणार नाही. मग एका पॅनमध्ये बटर आणि एक चमचा ओलिव्ह ओईल घालावं. बटर वितळल की त्यात १ चमचा मैदा घालावा व सतत ढवळत राहावं. मैदा थोडं शिजला की त्यात दूध घालावं. सतत ढवळाव.  गुठळ्या होऊ देऊ नयेत. हा व्हाईट सॉस थोडं दाट व्हायला लागला की त्यात पालकाची पेस्ट घालावी. छान मिक्स करून घ्यावं. त्यात आलं लसूण पेस्ट घालावी. काळ्या मिरीची पूड व चिली फ्लेक्स घालावेत. पास्ता घालून मिक्स करून घ्यावा. गरज वाटल्यास परत थोडं मीठ घालावं. serve करताना वरून किसलेलं चीज घालून गरम गरम serve करावं. 

या पास्त्यामध्ये अर्धा चमचा इटालियन सीजनिंग घातला तर हा पास्ता अधिकच चविष्ट होतो.

वाढणी :- २ ते ३ माणसे 

छोले बिर्याणी

साहित्य :-

१. १ कप बासमती तांदूळ

२. अर्धा कप छोले / कबुली चणा 

३. २ ते ३ मोठे चमचे दही

४. अर्धा चमचा हळद

५. अर्धा चमचा तिखट

६. १ हिरवी मिरची 

७. १ कप बारीक चिरलेला टोमॅटो

८. खडा मसाला :- तमालपत्र, ३ ते ४ लवंगा, ३ ते ४ मिरी, १ इंच दालचिनी, ३ ते ४ वेलदोडे 

९. चवीनुसार मीठ 

१०. बारीक चिरलेला पुदिना व कोथिंबीर प्रत्येकी अर्धा कप 

११. पाव वाटी दूध 

१२. ५ ते ६ केशराच्या काड्या

१३. आलं लसूण पेस्ट प्रत्येकी अर्धा चमचा

१४. वितळलेले तूप २ चमचे 

कृती:-

प्रथम बासमती तांदूळ ३ ते ४ पट पाणी व चवीनुसार मीठ  घालून शिजवावा. शिजवताना त्यात खड्या मसाल्याची पुरचुंडी करून घालावी. म्हणजे भाताला मसाल्याचा छान वास लागेल. हा भात शिजवताना मात्र एक काळजी घ्यावी आणि ती म्हणजे हा भात मोकळा शिजला पाहिजे. त्यामुळे भाताचा दाणा बघत राहावं. जेव्हा भात शिजला आहे असं वाटेल तेव्हाच तो गाळून घ्यावा व गार होऊ द्यावा. कबुली चणे आदल्या दिवशी भिजत घालावेत व बिर्याणी करायच्या आधी कुकरमध्ये शिजवून घ्यावेत. मग एका कढईमध्ये तेल घालून त्यात आलं लसूण पेस्ट घालावी. त्यात हळद, तिखट व हिरवी मिरची घालावी. टोमॅटो घालावेत व २ ते ३ चमचे पाणी घालून ते शिजू द्यावेत. टोमॅटो छान मऊ शिजले की त्यात दही घालावं व त्यात उकडलेले छोले घालावेत. चवीनुसार मीठ घालावे व दाटसर ग्रेव्ही तयार करावी. आता एक मायक्रोवेव्ह सेफ बाऊल घेऊन त्यात प्रथम वितळलेले तूप घालावे. त्यात मग भाताचा एक थर घालावा. वर पुदिना व कोथिंबीर घालावी. वरून चोल्याच्या ग्रेव्हीचा थर घालावा. परत भाताचा थर घालून पुदिना व कोथिंबीर घालावी. दूधामध्ये केशर घालून ते पण भातावर वरून घालावे. मायक्रोवेव्हमध्ये ५ मिनिटे झाकण घालून बिर्याणी शिजू द्यावी. मायक्रोवेव्ह नसेल तर असेच थर कढईमध्ये घालावेत व ही कढई आचेवर तवा ठेवून त्यावर ठेवावी. म्हणजे भात खालून लागणार नाही. ही बिर्याणी serve करताना डाव पूर्ण खालपर्यंत घालून सर्व थर उचलले जात आहेत न ते बघावे. एखाद्या रायत्यासोबत ही बिर्याणी गरम गरम serve करावी.

वाढणी :- २ ते ३ माणसे 

तळणीचे मोदक

साहित्य :-

१. १ कप मैदा

२. २ ते ३ चमचे बारीक रवा

३. २ चमचे तुपाचे मोहन 

४. चिमुटभर मीठ

५. दीड कप किसलेला सुकं खोबरं 

६. पाऊण वाटी साखर

७. २ चमचे खसखस 

८. ५ ते ६ बदाम

९. ४ ते ५ काजू

१०. १ चमचा वेलची पूड

११. चिमुटभर केशर

१२. वाटीभर कोमट दूध

१३. तळणीसाठी तेल 

कृती :-

प्रथम मैदा, रवा, चिमुटभर मीठ हे सर्व एकत्र करून त्यात तुपाचे मोहन घालावे. हे तूप सर्व मैद्यामध्ये अगदी छान एकजीव करून घ्यावे. नंतर दुधामध्ये पोळीच्या कणकेप्रमाणे कणिक मळून घ्यावी व झाकून ठेवावी. सुकं खोबरं व खसखस २ मिनिटं मध्यम आचेवर भाजून घ्यावी. ही भाजलेली खसखस व खोबरं, साखर, बदाम, काजू व वेलची पूड सर्व मिक्सरमधून बारीक करून घ्यावं. या बारीक झालेल्या खिरापतीमध्ये केशर घालावं. हे आपलं सारण तयार झालं. आता भिजवलेली कणिक खलबत्त्याने कुटून थोडी मऊ करून घ्यावी. मग त्याच्या छोट्या छोट्या लाट्या करून त्यात सारण भाराव. सर्व बाजूने लाटी एकत्र करायला सुरुवात करावी. सर्व लाटी नीट एकत्र आली की वर मोदकाचे तोंड दाबून बंद करावे. हा तयार मोदक ओल्या फडक्याखाली झाकून ठेवावा. सर्व मोदक तयार झाले की ते गरम तेलात मध्यम आचेवर तळून घ्यावे. हे तयार मोदक गणपतीच्या प्रसादासाठी वापरले जातात व ते ४ ते ५ दिवस टिकतात. 

वाढणी :- या साहित्यात ११ ते १२ मोदक होतील. 

खिरापत

साहित्य :-

१. दीड कप किसलेला सुकं खोबरं 

२. पाऊण वाटी साखर

३. २ चमचे खसखस 

४. ५ ते ६ बदाम

५. ४ ते ५ काजू

६. १ चमचा वेलची पूड

७. चिमुटभर केशर

८. २ चमचे खवा 

कृती :-

सुकं खोबरं व खसखस २ मिनिटं मध्यम आचेवर भाजून घ्यावी. ही भाजलेली खसखस व खोबरं, साखर, बदाम, काजू व वेलची पूड सर्व मिक्सरमधून बारीक करून घ्यावं. या बारीक झालेल्या खिरापतीमध्ये केशर घालावं. खिरापत serve करताना  थोडासा खवा भाजून त्यात घालावा. 

वाढणी :- १ छोटी वाटी प्रसाद या साहित्यात होईल. 

आलू टिक्की

साहित्य :-

१. ३ ते ४ मध्यम आकाराचे बटाटे

२. २ ते ३ हिरव्या मिरच्या

३. ३ ते ४ लसणाच्या पाकळ्या

४. पेरभर आल्याचा तुकडा

५. बारीक चिरलेली कोथिंबीर

६. २ चमचे कोर्नफ्लोर 

७. चवीनुसार मीठ

कृती:-

बटाटे उकडून सालं काढून किसून घ्यावेत. त्यात वाटलेली हिरवी मिरची, लसूण व आलं घालावं. या तिन्हीही गोष्टी मिक्सरमधून वाटून घ्याव्यात. त्यात कोर्नफ्लोर, कोथिंबीर व मीठ घालून छान गोळा मळून घ्यावा. हाताला तेल लावून या गोळ्याचे गोलाकार छोटे चपटे गोळे बनवावेत. किंवा तुम्हाला आवडेल त्या आकाराच्या टिक्की बनवाव्या. एका पॅन मध्ये थोडं थोडं तेल घालून या टिक्की shallow fry करून घ्याव्यात. सॉस किंवा चटणीसोबत  गरम गरम serve कराव्यात.

वाढणी :- २ ते ३ माणसे 

लसूण चटणी

साहित्य :-

१. ५ ते ६ लसणाच्या मोठ्या पाकळ्या 

२. ४ ते ५ चमचे किसलेला सुकं खोबरं 

३. २ ते ३ चमचे पांढरे तीळ

४. १ चमचा देघी मिरची पावडर

५. चवीनुसार मीठ

६. १ चमचा तेल

कृती :-

एका पॅनमध्ये तेल गरम करून घ्यावे. त्यात सुकं खोबरं, तीळ व लसूण भाजून घ्यावा. भाजलेल्या गोष्टी गार झाल्या की मिक्सरमध्ये मीठ व तिखट घालून बारीक करून घ्याव्यात. ही लसूण चटणी ७ ते ८ दिवस छान राहते. 

लादीपाव

साहित्य :-

१. दीड कप सेल्फ रायझिंग फ्लोअर किंवा मैदा 

२. १ चमचा यीस्ट 

३. पाव चमचा साखर

४. १ कप कोमट पाणी 

५. १ चमचा बटर

कृती :-

प्रथम एका काचेच्या किंवा स्टीलच्या भांड्यात सेल्फ रायझिंग फ्लोअर किंवा मैदा घ्यावा. जर तुम्ही मैदा वापरणार असाल तर त्यात अर्चा चमचा मीठ घालावं. पण सेल्फ रायझिंग फ्लोअरला मीठ घालायची गरज नाही. एका छोट्या वाटीमध्ये यीस्ट घेऊन त्यात साखर घालावी. कोमट पाण्यातील थोडं पाणी घालून यीस्ट active होण्यासाठी १० मिनिटे ठेवावे. पिठात हे यीस्ट घालून लागेल तेवढ्या पाण्यात पुरणाच्या पोळीसारखी पातळ कणिक मळावी. बटर लावून ही कणिक ५ ते ७ मिनिटे मळावी. हा daugh हाताला चिकटणार नाही अशा स्टेजला येईपर्यंत मळावा. मग काचेच्या किंवा स्टीलच्या भांड्यामध्ये ठेऊन वरून झाकावा. १ तास हा daugh ferment होऊ द्यावा. बकिंग ट्रेला तूप व मैदा लावून घ्यावा. ferment झालेल्या कणकेला हाताने बुक्क्या मारून त्यातील हवा काढावी व गोळा पुन्हा मळून घ्यावा. हाताला थोडे पीठ लावून या गोळ्याचे छोटे छोटे गोळे करून ते ट्रे मध्ये एकमेकाला थोडेसे चिकटतील असे ठेवावे. पुन्हा झाकून हे गोळे अर्धा तास ferment होऊ द्यावेत. तोवर ओव्हन ३५०f ला preheat करून घ्यावा. अर्ध्या तासाने ह्या गोळ्यांना वरून दुधाचा हात लावून बेक करायला ठेवावे. ३० मिनिटे बेक झाल्यावर बाहेर काढून लगेचच या पावला बटर लावावे. त्यामुळे पाव मऊ राहतो. हा पाव एका जाळीवर थंड होण्यासाठी ठेवावा. थंड झाला की एकमेकांपासून अलग करून मधोमध कापावा. वडा पाव, पाव भाजी किंवा अच्छी दाबेली सारख्या पदार्थांमध्ये हा पाव वापरता येऊ शकतो. तुमच्या ओव्हन नसेल तर convection microwave मध्ये १८०c  वर तुम्ही हा पाव बेक करू शकता. 

वाढणी :- या साहित्यात ५ ते ६ पाव होतील. 

वडा बनवण्याची कृती या पत्त्यावर पहावी :- http://migruhini.blogspot.com/2012/04/blog-post_30.html

दुधी हलवा

साहित्य :-

१. २ कप किसलेला दुधी

२. १ कप दूध

३. पाव कप खवा

४. १ कप साखर

५. अर्धा चमचा वेलची पूड

६. चिमूटभर केशर

७. काजू व बेदाणे प्रत्येकी  ३ चमचे

८. ४ ते ५ चमचे तूप

कृती :-

प्रथम दुध्या किसून घ्यावा. किसायाच्या आधी त्यातल्या बिया काढून टाकाव्यात. एका कढईमध्ये तूप घाव. त्यात काजू व बेदाणे घालावेत. काजू सोनेरी झाले व बेदाणे फुगले की त्यात किसलेला दुधी घालावा. मध्यम आचेवर झाकण ठेवून १० मिनिटे दुघी शिजवावा. मध्ये मध्ये झाकण काढून ढवळून घ्यावे. मग त्यात दूध घालावे व दुधी पूर्ण दूध आटेपर्यंत शिजवावा. मग त्यात साखर घालावी. साखर घातल्याने हलवा पुन्हा पातळ होऊ लागेल. अजून ५ मिनिटे सतत ढवळत दुधी शिजला की तो थोडा घट्ट होऊ लागेल. मग त्यात खव्याचा चुरा घालावा. वेलची पूड व केशर घालून छान मिक्स करून घ्यावे. हलवा गार किंवा गरम कसाही serve करावा. दूध व खवा या दोन्ही गोष्टींमुळे हलवा अतिशय रीच होईल.

वाढणी :- २ ते ३ माणसे 

पालकवाली दाल

साहित्य :-

१. १ कप बारीक चिरलेला पालक

२. १ कप शिजवलेली मुगाची डाळ

३. १/२ कप बारीक चिरलेला कांदा

४. बारीक चिरलेला छोटा टोमॅटो

५. अर्धा चमचा हळद

६. २ सुक्या लाल मिरच्या 

७. फोडणीसाठी तेल व जीरं 

८. ४ ते ५ कढीपत्त्याची पानं 

९. चवीनुसार मीठ

कृती:-

प्रथम एका कढईमध्ये तेल तापवून त्यात जीरं घालावं.  जीरं थोडं तडतडल की त्यात कढीपत्ता, हळद, सुक्या लाल मिरच्या  व बारीक केलेला कांदा घालावा. कांदा मऊ झाला की मग त्यात टोमॅटो घालून तो मिळून येईपर्यंत शिजवावे. मग त्यात पालकाची धुवून चिरलेली पाने घालावीत. ५ ते ७ मिनिटे ही पाने शिजू द्यावी. मग शिजवलेली मुगाची डाळ घालावी. चवीनुसार मीठ घालून ही पालकवाली दाल ५ मिनिटे अजून शिजवावी. भाताबरोबर गरम गरम serve करावी.

वाढणी :- २ ते ३ माणसे  

भडंग

साहित्य :-

१. ३ ते ४ कप चुरमुरे 

२. ३ ते ४ चमचे शेंगदाणे 

३. ७ ते ८ कढीपत्त्याची पाने

४. अर्धा चमचा तिखट

५. चिमूटभर हिंग

६. पाव चमचा हळद

७. अर्चा चमचा गोडा मसाला किंवा भडंग मसाला

८. चवीनुसार मीठ

९. फोडणीसाठी तेल

कृती:-

एका कढईमध्ये तेल तापवावे. त्यात मोहरी घालून ती तडतडली की मग कढीपत्ता व शेंगदाणे घालावेत. शेंगदाणे नीट परतले की त्यात हळद, तिखट, हिंग व गोडा मसाला घालून परतावे. लगेचच चुरमुरे घालावेत. चुरमुर्यामध्ये मीठ असेल तर त्याचा अंदाज घेऊन मगच मीठ घालावे. छान मिक्स करून घ्यावे. भडंग तयार झाल्यावर serve करताना त्यात कांदा, टोमॅटो व कोथिंबीर घालून द्यावे. 

वाढणी :- २ ते ३ माणसे 

कांद्याची गोल भजी

साहित्य :-

१. १ कांदा बारीक चिरलेला

२. २ हिरव्या मिरच्या बारीक चिरलेल्या 

३. १ कप बेसन

४. अर्धा चमचा तिखट

५. पाव चमचा हळद 

६. चवीनुसार मीठ

७. अर्धा कप पाणी 

८. चिमूटभर खायचा सोडा

९. बारीक चिरलेली कोथिंबीर 

१०. तळणीसाठी तेल

कृती:-

एका भांड्यामध्ये बेसन घ्यावं. त्यात तिखट, हळद, हिरवी मिरची, खायचा सोडा, कोथिंबीर या सर्व गोष्टी घालाव्यात. एकदा मिक्स करून मग हळू हळू पाणी घालत बॅटर तयार करावं. हे बॅटर पातळ असू नये थोडं घट्ट असावं. त्यातच बारीक चिरलेला कांदा घालावा. तेल तापवून घेऊन हाताने कांद्यासहित  थोडं थोडं बॅटर तेलात घालावं. हाताने घालायचा नसेल तर चमच्याने देखील ही भजी घालता येतील. तेलामध्ये ही भजी छान सोनेरी रंगावर तळून घ्यावीत. ऐन पावसाच्या दिवसात गरम गरम चहासोबत अशी गरम गरम भजी serve करावीत. 

वाढणी :- २ ते ३ माणसे 

लेमन राईस

साहित्य :-

१. २ कप शिजवलेला भात

२. ४ ते ५ चमचे लिंबाचा रस

३. २ ते ३ चमचे शेंगदाणे 

४. २ चमचे हरभऱ्याची डाळ 

५. ४ ते ५ कढीपत्त्याची पानं

६. १ हिरवी मिरची 

७. अर्धा चमचा हळद 

८. २ ते ३ सुक्या लाल मिरच्या 

९.  सजावटीसाठी कोथिंबीर

१०. चवीनुसार मीठ 

कृती :-

प्रथम भात शिजवून घ्यावा. भात शिजवतानाच त्यात चवीनुसार मीठ घालावे. हरभऱ्याची डाळ पाण्यात भिजवून ठेवावी.  भात शिजला की एका कढईमध्ये तेल तापवावे. त्यात मोहरीची फोडणी करावी. कढीपत्त्याची पानं घालावीत. हिरवी मिरची व लाल मिरची घालून परतून घ्यावे.  हरभऱ्याची डाळ व शेंगदाणे घालावेत. हळद घालावी. त्यात लगेचच शिजलेला भात घालून छान मिक्स करून घ्यावे. भातामध्ये लिंबाचा रस घालावा व पुन्हा भात मिक्स करून घ्यावा. कोथिंबीर घालून हा भात गरम गरम serve करावा. बाहेर ट्रीपला नेण्यासाठी देखील हा भात सोपा व टिकाऊ आहे. 

वाढणी :- २ ते ३ माणसे 

चिकन बिर्याणी

साहित्य :-

१. २ कप भिजवलेले बासमती तांदूळ

२. ४ ते ५ चिकन थाईज

३. ४ ते ५ मोठे चमचे दही

४. आलं लसूण पेस्ट प्रत्येकी १ चमचा

५. हिरवी मिरची १ किंवा २ 

६. लाल तिखट पावडर १ ते २ चमचे 

७. वेलची पूड २ चमचे

८. तळलेला कांदा १ कप

९. बारीक चिरलेला पुदिना १/२  कप

१०. बारीक चिरलेली कोथिंबीर १ कप 

११. हळद अर्धा चमचा 

१२. पातळ तूप अर्धी वाटी

१३. गरम मसाला पावडर २ चमचे

१४. लिंबाचा रस २ चमचे 

१५. मसाला वेलची १

१६. काळी मिरी ४ ते ५ 

१७. लवंगा ४ ते ५

१८. शाही जीरं 

१९. दालचिनी पेरभर 

२०. तमालपत्र मध्यम आकाराची २

२१. चवीनुसार मीठ 

कृती :-

प्रथम एका कढईमध्ये ५ कप पाणी उकळत ठेवावे. पाणी उकळायला लागले की त्यात २ छोटे चमचे मीठ घालावे. मग तमालपत्र, मिरी, लवंग, दालचिनी, मसाला वेलची व शाही जीरं हे सर्व मसाले एका कपड्यात बांधून त्याची पुरचुंडी या पाण्यात सोडावी. अर्धा तास भिजलेले तांदूळ या पाण्यात घालून भात शिजू द्यावा. हा भात पूर्ण शिजवू नये. ३/४ भात शिजला की तो गाळून घ्यावा. मसाल्याची  पुरचुंडी काढून टाकावी. एकीकडे भात शिजेपर्यंत ज्या कढईमध्ये बिर्याणी करायची आहे त्यात चिकन मॅरीनेट करावं. यासाठी सरळ बुडाच पातेलं वापरावं. त्यामध्ये दही, हळद, तळलेल्या कांद्यामाधला अर्धा कांदा, तिखट, वेलची पूड मधली अर्धी पूड, लिंबाचा रस, आलं लसूण पेस्ट, अर्धा पुदिना व अर्धी कोथिंबीर, हिरवी मिरची बारीक तुकडे करून, गरम मसाला १ चमचा व पातळ तुपातले ४ ते ५ चमचे तूप व चवीनुसार मीठ या सर्व गोष्टी एकत्र कराव्यात. हे मीठ केवळ या मासाल्यापुरते घालावे. भात आपण मीठ घालूनच शिजवत आहोत. हा मसाला तयार झाला की चिकन धुवून स्वच्छ करून थोडे मोठे तुकडे करून या मसाल्यात घालावे. चिकन बोन्ससहित असावे तसेच  थोडे बोनलेस तुकडे पण असावेत. हे  मॅरीनेट केलेलं चिकन किमान अर्धा तास ठेवावं. फ्रीजमध्ये ठेवायची गरज नाही. आता हे पातेलं मध्यम आचेवर ठेवावा. या चिकनवर ३/४ शिजलेल्या भातामधला अर्धा भात घालावा. त्यावर २ चमचे तूप, थोडी वेलची पूड, गरम मसाला, पुदिना व कोथिंबीर व थोडा तळलेला कांदा हे सर्व घालावे. उरलेला भात घालून पुन्हा त्यावर राहिलेले तूप, राहिलेली वेलची पूड, राहिलेला सर्व तळलेला कांदा, गरम मसाला, पुदिना व कोथिंबीर घालावी. थोडे पाणी शिंपडून आच वाढवून पातेल्याला घट्ट झाकण लावावे. झाकणातून खूप  वाफ बाहेर यायला लागली की आच मध्यामाहून कमी करावी. या कमी आचेवर बिर्याणी २० मिनिटे शिजू द्यावी. चिकनला थोडा भाजल्याचा खुसखुशीतपणा येईल पण  आच कमी केली नाही तर चिकन खालून जळेल. तसे होऊ देऊ नये. २० मिनिटांनी झाकण उघडून हळुवार हाताने भात व चिकन एकत्र करावे व रायत्या सोबत ही गरम गरम बिर्याणी serve करावी. 

वाढणी :- २ ते ३ माणसे 

मेक्सिकन राईस

साहित्य :-

१. भिजवलेले तांदूळ १ कप

२. लाल सिमला मिरची पाव कप

३. लाल  टोमॅटो पाव कप

४. ४ ते ५ सुक्या लाल मिरच्या 

५. किसलेलं गाजर पाव कप 

६. व्हेजिटेबल स्टॉक

७. बारीक चिरलेला कांदा

८. ऑलिव ऑईल 

९. चवीनुसार मीठ 

१०. ४ ते ५ लसूण पाकळ्या 

कृती :- 

प्रथम एका पॅनमध्ये ऑलिव ऑईल घेऊन त्यात लाल सिमला मिरचीचे मोठे तुकडे, टोमॅटोचे मोठे तुकडे, लसणाच्या पाकळ्या आणि लाल मिरच्या सर्व घालून परतत ठेवावे. हे सर्व पदार्थ करपल्यासारखे थोडे थोडे काळसर दिसेपर्यंत परतावेत. मग गार झाल्यावर मिक्सरमध्ये वाटून घ्यावेत. एका कढईमध्ये ऑलिव ऑईल घेऊन त्यात कांदा घालावा. तो मऊ होईपर्यंत परतून घ्यावा. त्यात भिजवलेले तांदूळ घालावेत. थोडावेळ परतून मग त्यात मिक्सरमध्ये वाटलेला मसाला घालावा.हा मसाला तुम्हाला किती तिखट पाहिजे त्या चवीनुसार घालावा. बऱ्याचदा सगळा मसाला वापरण्याची गरज भासत नाही. हा उरलेला मसाला फ्रीजमध्ये हवाबंद डब्यामध्ये ७ ते ८ दिवस टिकतो.  व्हेजिटेबल स्टॉक मिळाला तर तो घालून भात शिजवावा नाहीतर साध्या पाण्यात भात शिजवला तरी चालतो. व्हेजिटेबल स्टॉक घालून भात शिजवताना मिठाची चव घेऊन लागेल तसे मीठ घालावे. स्टॉक घातल्यावर भात शिजायला जरा वेळ लागतो. भात थोडा शिजत आलं की त्यात किसलेलं गाजर घालून भात पूर्ण शिजवून घ्यावा. हा भात सोअर क्रीम व सलाड सोबत गरम गरम serve कारावा. 

वाढणी :- २ ते ३ माणसे. 

आलू पराठा

साहित्य :-

१. २ ते ३ मध्यम आकाराचे बटाटे

२. पेरभर आलं

३. २ ते ३ लसूण पाकळ्या 

४. २ ते ३ मिरच्या 

५. अर्ध्या लिंबाचा रस

६. चवीनुसार मीठ 

७. बारीक चिरलेली कोथिंबीर 

८. २ कप पोळीची कणिक

९. कणकेच्या गोळ्याला लावण्यासाठी तेल 

१०. पराठे भाजण्यासाठी तूप किंवा बटर 

कृती:-

प्रथम बटाटे उकडून घ्यावेत. बटाटे गार झाल्यावर ते हाताने मॅश करून घ्यावेत. आलं, लसूण व मिरची थोडंसं मीठ घालून मिक्सरमधून वाटून घ्यावे. हे मिश्रण बटाट्यामध्ये घालावे. त्यात चवीनुसार  मीठ, लिंबाचा रस व बारीक चिरलेली कोथिंबीर घालून छान गोळा मळून घ्यावा. पोळीच्या कणकेप्रमाणे कणिक मळून घ्यावी. थोडेसे तेल लावून ही कणिक १० मिनिटे झाकून ठेवावी. या पोळीच्या कणकेचे छोटे छोटे गोळे करून घ्यावेत. तसेच बटाट्याच्या सारणाचेही गोळे करावेत. पोळीच्या कणकेचा एक गोळा घेऊन तो थोडासा लाटावा व त्यात बटाट्याच्या सारणाचा गोळा घालून सर्व बाजूनी बंद करून घ्यावे. हा गोळा पिठात घोळवून बंद बाजू खाली ठेवून हलक्या हाताने लाटावा. तवा मध्यम आचेवर तापवून घ्यावा व पराठा दोन्ही बाजूनी तूप किंवा बटर लावून भाजून घ्यावा. कोबीच्या कोशिंबिरीसोबत व लोणच्यासोबत आलू पराठा गरम गरम serve करावा.  

वाढणी :- २ ते ३ माणसे 

केळ्याची कोशिंबीर

साहित्य :-

१. २ पिकलेली केळी

२. १ ते दीड कप दही

३. चिमूटभर मीठ

४. ३ ते ४ चमचे साखर

५. १ मध्यम आकाराची हिरवी मिरची

६. कोथिंबीर

कृती:-

दोन्ही केळी सोलून कापून घ्यावी. त्यात दही, साखर, व मीठ घालावे. हिरवी मिरची बारीक चिरून घालावी व आवडत असल्यास कोथिंबीर घालावी. ही कोशिंबीर पोळीबरोबर छान लागते किंवा नुसती खायला पण छान वाटते. लहान मुलांना ही कोशिंबीर देताना मिरची न घालता दिली तरी चविष्ट लागते. उपवासाला देखील नुसती खायला ही कोशिंबीर चालते. 

वाढणी :- २ ते ३ माणसे.

मटकी- श्रावण घेवडा भाजी

साहित्य :-

१. मोड आलेली मटकी अर्धा कप

२. बारीक चिरलेला घेवडा दीड कप

३. चिमूटभर हळद

४. अर्धा चमचा तिखट

५. प्रत्येकी अर्धा चमचा धना जीरा पूड

६. गोडा मसाला १ चमचा

७. चवीनुसार मीठ

८. फोडणीसाठी तेल,मोहरी व हिंग 

९. कढीपत्त्याची पानं ५ ते ६ 

१०. बारीक चिरलेली कोथिंबीर व खोबरं सजावटीसाठी

कृती:-

प्रथम श्रावण घेवडा व मोड आलेली मटकी एकत्र करून कुकरला २ शिट्ट्या करून शिजवून घ्यावी. एका कढईमध्ये तेल तापवावे व त्यात मोहरी, कढीपत्ता व हिंग घालावे. लगेचच सगळे मसाले घालावेत व आच कमी करावी. मसाले तेलात परतले की लगेच त्यात शिजवलेली मटकी व घेवडा घालावा. आवश्यक तेवढे पाणी व चवीनुसार मीठ घालून भाजीला छान उकळी येऊ द्यावी. ही भाजी खोबरं व कोथिंबीर घालून गरम गरम serve करावी.

वाढणी :- २ ते ३ माणसे 

मेथी चिकन

साहित्य :-

१. चिकन थाईज ४ ते ५

२. १ मोठा कांदा बारीक चिरून

३. १ मोठा टोमॅटो बारीक चिरून

४. ४ ते ५ लवंगा

५. ४ ते ५ अक्खी वेलची

६. दालचिनी तुकडा

७. आलं लसूण पेस्ट प्रत्येकी १ चमचा

८. कसुरी मेथी १/४ कप

९. चवीपुरतं मीठ

१०. तिखट पूड १ चमचा

११. धणे जिरे पूड प्रत्येकी १ चमचा

१२. गरम मसाला अर्धा चमचा

१३. हळद अर्धा चमचा

१४. सजावटीसाठी कोथिंबीर

कृती:-

प्रथम चिकन स्वच्छ धुवून घ्यावं. नंतर एका कढईमध्ये तेल घेऊन ते गरम झालं की त्यात वेलची, लवंग व दालचिनी घालावी. मग  त्यात कांदा घालावा. थोडा परतल्यावर आलं लसूण पेस्त घालावी. ही पेस्ट थोडी परतली की मग त्यात हळद, धणे जिरे पूड घालावी. थोडं परतावं व त्यात टोमॅटो घालावा. थोडंसं पाणी घालून झाकण ठेवून टोमॅटो छान  मॅश होईपर्यन्त शिजवावा. मग या ग्रेव्ही मध्ये तिखट व गरम मसाला घालावा. छान मिक्स करून मग त्यात चिकन घालावा. परत एकदा मिक्स करून झाकण ठेवून चिकन शिजू दयावं.  मधून मधून चिकन परतावं व आवश्यक वाटल्यास पाणी घालावं. चिकन ८०% शिजलं की त्यात कसुरी मेथी घालावी. मेथी घालताना हातावर एकदा चोळावी जेणेकरून त्याची छान पूड होईल. चवीपुरतं मीठ घालून पुन्हा एकदा सर्व जिन्नस मिक्स करून झाकण लावून शिजवावेत. गरम गरम मेथी चिकन रोटी, नान अथवा पराठ्यासोबत serve करावं.

वाढणी  :- ३ ते ४ माणसे

दाल बाटी

साहित्य :-

१. १ कप गव्हाची कणिक

२. पाव कप रवा

३. अर्धा चमचा ओवा

४. ४ ते ५ चमचे तेलाचे मोहन

५. चवीनुसार मीठ

६. तुरीची दाल अर्धा कप

७. अर्धा कप मुग दाल

८. कढीपत्ता

९. लाल मिरच्या ३ ते ४

१०. आलं, लसूण प्रत्येकी पेरभर

११. पाव कप कांदा बारीक चिरून 

१२. १ चमचा हळद

१३. फोडणीसाठी तेल व जीरं 

कृती :-

प्रथम गव्हाची कणिक, रवा व ओवा मिक्स करून घ्यावे व त्यात तेलाचे मोहन व चवीनुसार मीठ घालावे. थोडी हळद घालावी. पाणी घालत घालत याचा छान गोळा मळून घ्यावा. कुकरच्या एका भांड्यामध्ये हा गोळा व एका भांड्यात तूर व मुग डाळ एकत्र करून ३ शिट्ट्या करून घ्याव्या. शिजलेला बाटीचा गोळा छोट्या छोट्या वड्यामध्ये कापून घ्यावा व तेलावर तळून घ्यावा. एका कढईमध्ये तेल तापवावे व त्यात जीरं, लाल मिरच्या, कढीपत्ता घालून फोडणी करावी. हळद घालावी व कांदा घालून परतावे. आलं , लसूण घालून मिनिटभर पुन्हा परतून घ्यावे. कांदा छान मऊ झाला की त्यात शिजलेल्या डाळी घालाव्यात. थोडं पाणी व चवीनुसार मीठ घालून या वरणाला छान उकळी आणावी. कोथिंबीर घालावी. दाल बाटी serve करताना बाटी मोडून कुस्करावी व त्यावर वरण, तूप, व लिंबू पिळून घालावे. छान, खुसखुशीत दाल बाटी गरम असताना खावी. 

वाढणी :- २ ते ३ माणसे 

शेवयांचा उपमा

साहित्य :-

१. १ कप बोम्बिनो शेवया 

२. २ मोठे चमचे स्वीट कॉर्न 

३. २ मोठे चमचे चमचे मटार

४. २ मोठे चमचे चौकोनी कापलेले गाजर

५. फोडणीसाठी तेल

६. २ हिरव्या मिरच्या 

७. चवीनुसार मीठ 

८. बारीक चिरलेला कांदा पाव कप

९. पेरभर किसलेला आलं 

१०. खवलेलं खोबरं आणि कोथिंबीर सजावटीसाठी 

कृती :-

प्रथम एका पातेल्यात पाणी उकळत ठेवावे. पाण्याला उकळी आली की त्यात चवीनुसार मीठ व शेवया घालून साधारणपणे ४ ते ५ मिनिटे शिजवून घ्यावे. नंतर लगेचच या शेवया गाळून घ्याव्यात. त्याच्यावर गार पाणी सोडावे व थोडेसे तेल घालून हळुवार हाताने मिक्स करून घ्यावे. असे केल्याने शेवया एकमेकाला चिकटणार नाहीत. मग एका कढईमध्ये तेल तापवून घ्यावे. त्यात फोडणी करावी. फोडणीमध्ये हिरवी मिरची व आलं घालावं. आवडत असल्यास शेंगदाणे देखील घालावेत. थोडंसं परतून मग कांदा घालावा. कांदा मऊ झाला की हळद व सगळ्या भाज्या घालाव्यात व थोडंसं मीठ व पाणी घालून भाज्या शिजवून घ्याव्यात. हे मीठ केवळ भाज्यांपूरतच घालावं. जर फ्रोझन मटार व स्वीट कॉर्न वापरलं तर शिजायला फारसा वेळ लागत नाही. भाज्या शिजल्या आणि पाणी आटलं की मग शेवया घालाव्यात व अगदी हलक्या हाताने सर्व मिक्स करून घ्यावं. serve करताना वरून खोबरं व कोथिंबीर घालावी आणि गरम गरम serve करावं. 

वाढणी :- २ ते ३ माणसे 

नारळाची बर्फी

साहित्य :-

१. खवलेला नारळ २ कप

२. साखर दीड कप

३. फेटलेली दाट साय किंवा फ्रेश क्रीम २ ते ३ चमचे

४. वेलची पूड अर्धा चमचा

५. आवडीनुसार ड्रायफ्रुट्स 

६. चिमूटभर केशर 

कृती :-

खवलेला नारळ, साखर व फेटलेली साय किंवा फ्रेश क्रीम सर्व एका कढईमध्ये एकत्र करावे.  मध्यम आचेवर हे सर्व मिश्रण शिजवावे. साखर विरघळली की हे मिश्रण थोडे सैल होते. यावेळी वेलची पूड व केशर घालावे. त्यानंतर एक ५ मिनिटे शिजवले की मिश्रण कढईच्या कडेने सुटायला लागते व दाट व्हायला लागते. असे झाले की लगेचच आच बंद करून तूप लावलेल्या एका तटावर हे मिश्रण जाडसर पसरून घ्यावे. त्यावर लगेचच  ड्रायफ्रुट्स घालावीत व हाताने थोडेसे दाबावे. ही बर्फी थोडी गार झाली की सुरीने त्याच्या वड्या पडून घ्याव्या. बर्फी पूर्ण गार झाली की मगच उचलावी.

वाढणी  :- या साहित्यात साधारणपणे १२ ते १५ वड्या होतील.

बटाटा वडा

साहित्य :-

१. उकडलेले बटाटे ३ ते ४

२. ४ हिरव्या मिरच्या 

३. ४ ते ५ लसूण पाकळ्या 

४. पेरभर आल्याचा तुकडा 

५. कोथिंबीर

६. ५ ते ६ चमचे डाळीचे पीठ/ बेसन 

७. अर्धा चमचा तिखट

८. पाव चमचा हळद

९. चिमूटभर बेकिंग सोडा

१०. चवीनुसार मीठ

११. तळणीसाठी तेल

कृती:-

प्रथम उकडलेले बटाटे हाताने मॅश करून घ्यावेत. हिरवी मिरची, लसूण व आलं मिक्सरमध्ये वाटून घ्यावं. तेलावर हे वाटलेलं आलं, लसूण व मिरची थोडसं परतून घ्यावं. त्यात चिमूटभर हळद घालावी. मॅश केलेला बटाटा घालावा व लगेचच आच बंद करावी. थोडी कोथिंबीर घालून या मिश्रणाचा छान गोळा करून घ्यावा.  मग बेसन, तिखट, सोडा, हळद व मीठ हे सर्व एकत्र करावं. थोडं थोडं पाणी घालत गुठळ्या होणार नाहीत अशा प्रकारे थोडं दाटसर पीठ बनवून घ्यावं. बटाट्याच्या मिश्रणाचे लहान मोठ्या आकाराचे गोळे करून घ्यावेत. एका कढईमध्ये तेल तापवून घ्यावं. आच माध्यमच ठेवावी.  बटाट्याचा एक गोळा बेसनाच्या मिश्रणात घोळवून तेलात सोडवा व छान खुसखुशीत वडे तळून घ्यावेत. केचअप बरोबर किंवा पुदिना कोथिंबिरीच्या चटणीसोबत गरम गरम serve करावेत. 

वाढणी :- २ ते ३ माणसे 

बनाना वॉल्नट ब्रेड

साहित्य :-

१. ३ पूर्ण पिकलेली केळी

२. २ कप मैदा

३. १/२ चमचा बेकिंग सोडा 

४. १/२ चमचा बेकिंग पावडर

५. १ चमचा  व्हॅनिला इसेन्स 

६. १/३ कप साखर

७. आवडत असल्यास पाव चमचा दालचिनीची पूड

८. २ अंडी

९. १/३ कप दही 

१०. बटर अर्धी स्टिक 

कृती :-

प्रथम केळी सोलून ती छान मॅश करून घ्यावी. दुसऱ्या बाउल मध्ये मैदा, बेकिंग पावडर, बेकिंग सोडा व साखर हे सर्व घालून छान मिक्स करून घ्यावं. केळी मॅश केलेल्या बाउल मध्ये बटर, व्हॅनिला इसेन्स, २ अंडी व दही घालावे आणि सर्व पदार्थ छान मिक्स करावेत. मग या मिश्रणात मैदा घालावा. सर्व मैदा एकाच वेळी घालू नये. थोडा थोडा मैदा केळ्याच्या मिश्रणात घालून मिक्स करून घ्यावे. मग त्यात तुकडे केलेले वॉल्नट घालावेत. या वेळेपर्यंत ओवन ३५०f ला preheat करून घ्यावा. ओवनच्या  एखाद्या नॉनस्टिक भांड्याला बटर लावावे व त्याच्यावर थोडासा मैदा भुरभुरावा. आपण तयार केलेले ब्रेडचे मिश्रण या ग्रीस केलेल्या भांड्यात ओतावे. हा ब्रेड बेक व्हायला साधारणपणे  ५० ते ५५ मिनिटे लागतील. ब्रेड तयार झाला की टूथपिक किंवा नाईफ मधोमध घालून बघावे. जर नाईफला ब्रेडचे मिश्रण लागले नाही तर ब्रेड तयार झाला असे समजावे. ब्रेड गार झाला की मग त्याचे slice करावेत. 

वाढणी :- २ ते ३ माणसे